Զելենսկին արձագանքել է Պուտինի` Մոսկվա մեկնելու հրավերին

Ուկրաինայի նախագահ Վլադիմիր Զելենսկին պատրաստ է հանդիպել Կրեմլի ղեկավար Վլադիմիր Պուտինի հետ ցանկացած վայրում, բացի Մոսկվայից։ Ինչպես հաղորդում է  RBC-Ukraine-ն, այս մասին ուղիղ եթերում հայտարարել է նախագահի աշխատակազմի խորհրդական Սերգեյ Լեշչենկոն։

«Վլադիմիր Զելենսկին պատրաստ է հանդիպել Վլադիմիր Պուտինի հետ ցանկացած վայրում, բացի Մոսկվայից։ Որովհետև Մոսկվան ագրեսոր երկրի մայրաքաղաքն է։ Բանակցությունների այս ձևաչափը անհնար է», - ասել է Լեշչենկոն։

Հարկ է նշել, որ սա, ըստ էության, պատասխան էր ռուսական կողմին, քանի որ Պուտինի օգնական Յուրի Ուշակովն այսօր ավելի վաղ հայտարարել էր, որ եթե Զելենսկին ցանկանում է հանդիպում, ապա պետք է գնա Մոսկվա: Ուշակովի խոսքով՝ Պուտինը պատրաստ է հանդիպման, և նման հանդիպում կկազմակերպվի: