Մեղրին դրա սիրտն ու հոգին է. Փաշինյան

Մեղրի կատարած այցի ընթացքում ՀՀ վարչապետ Նիկոլ Փաշինյանը քաղաքն անվանել է «Խաղաղության խաչմերուկ» նախագծի սիրտն ու հոգին։

Մայիսի 9-ին տեղի բնակիչների հետ հանդիպման ժամանակ կառավարության ղեկավարը հետաքրքրվել է վերջին 9 ամիսներին Մեղրիում անշարժ գույքի գների փոփոխությամբ։ Համայնքի ղեկավարը, արձագանքելով հարցին, հայտնել է, որ այդ ընթացքում գները կրկնապատկվել են։

Վարչապետի խոսքով՝ սա վկայում է այն մասին, որ Մեղրին ոչ միայն հավատում է խաղաղությանը, այլև հենց ինքը «Խաղաղության խաչմերուկ» է։ 

«Եվ ես եկել եմ ձեզ-մեզ շնորհավորեմ բոլորիս այդ առիթով, որովհետև եթե Մեղրին «Խաղաղության խաչմերուկ» է, ուրեմն Հայաստանի Հանրապետությունն է «Խաղաղության խաչմերուկ»։ Ուրեմն՝ Հայաստանի Հանրապետությունը բարեկեցության խաչմերուկ է։ Հայաստանի Հանրապետությունը ազատության, բարեկեցության, աշխատանքի խաչմերուկ է»,- հայտարարել է Նիկոլ Փաշինյանը։

Նա նաև համոզմունք է հայտնել, որ Մեղրիի ձգողականությունն էլ ավելի է մեծանալու։ Գործադիրի ղեկավարը վստահություն է հայտնել, որ մինչև տարեվերջ երկաթուղու կառուցման ուղղությամբ կձեռնարկվեն կոնկրետ քայլեր, ինչը կհանգեցնի համայնքում բազմաթիվ նոր աշխատատեղերի ստեղծմանը։