Հայ անունն ու հաղթանակը պետք է կրկին կապվեն. Նարեկ Կարապետյան

«Ուժեղ Հայաստան» կուսակցության խորհրդի անդամ Նարեկ Կարապետյանի համոզմամբ՝ ապագայում հայ անունն ու հաղթանակը պետք է մշտապես ուղեկցեն միմյանց։

Նարեկ Կարապետյանը նշել է, որ եռատոնի խորհուրդը, որն այսօրվա պարտությունների հետևանքով ափսոսանքի օր է դարձել, պետք է վերականգնվի ազգի մեջ որպես հաղթանակի զգացողություն։ Ըստ նրա՝ փորձ է արվում հեռացնել հայ և հաղթանակ բառերն իրարից ու մարդկանց ներշնչել, թե հաջողություններն անհնար են, մինչդեռ ապագա հաղթանակները պետք է լինեն աշխատանքային։

Կարապետյանի պնդմամբ՝ հենց բարեկեցությունն է այն հաղթանակը, որով կամրագրվի մեր դերը տարածաշրջանում։ Նա հավելել է, որ լավ ապրելն ու սփյուռքահայերի վերադարձը Հայաստան կլինի այն հաղթանակը, որը կապացուցի բոլորին հաղթելու կարողությունը, և հենց այդ ուղով պետք է շարժվել։

«Ուժեղ Հայաստան» կուսակցության անդամները նաև այցելել են Հաղթանակի զբոսայգի՝ հարգելու նահատակների հիշատակը։