Հերթական համայնքների խոշորացում. նախագիծ

Ազգային ժողովի առաջին ընթերցմամբ քննարկվեց վարչատարածքային բաժանման մասին օրենքում և հարակից օրենքներում փոփոխություններ նախատեսող փաթեթը:

Խորհրդարանի նիստի ժամանակ նախագծերի փաթեթը ներկայացրեց Տարածքային կառավարման և ենթակառուցվածքների նախարարի տեղակալ Առնակ Ավետիսյանը։ Ըստ առաջարկի՝ Լոռու մարզում կձևավորվի Ստեփանավան խոշորացված համայնքը, որում կներառվեն Ստեփանավան, Գյուլագարակ և Լոռի Բերդ համայնքները՝ ընդգրկելով 20 բնակավայր։ Սյունիքի մարզում նախատեսվում է միավորել Գորիս, Տաթև և Տեղ համայնքները՝ ստեղծելով Գորիս խոշորացված համայնքը՝ 28 բնակավայրով։ Վայոց ձորի մարզում ծրագրվում է Եղեգնաձոր, Արենի և Եղեգիս համայնքների միավորումը՝ 32 բնակավայրերով ձևավորելով նոր՝ Եղեգնաձոր խոշորացված համայնքը։

Առնակ Ավետիսյանը հայտնեց, որ ծրագրում ներգրավված են 9 համայնք և 80 բնակավայր, որոնց միավորումից կստեղծվի 3 նոր համայնք։ Այս փուլի ավարտին Հայաստանում համայնքների թիվը կհասնի 64-ի։ Չխոշորացված կարգավիճակում կմնան Երևանը, Գյումրին և ազգային փոքրամասնություններով բնակեցված 5 համայնք։ Օրինագծերի ընդունման պարագայում նշված համայնքներում ավագանու ընտրությունները կկայանան 2026 թվականի աշնանը։