Վեդիում ձերբակալվել է երեխաների հորեղբայրը. մանրամասներ

Փաստաբան Ռուբեն Մելիքյանը տեղեկացնում է, որ սեռական բռնության ենթարկված 15 և 17 տարեկան աղջիկների հորեղբայրը գտնվում է Երևանի ձերբակալվածների պահման վայրում։

Տղամարդուն վերաբերող գործն անցնում է երկու դրվագով, որոնցից մեկը կապված է Վեդու բաժնի ոստիկանին հարվածելու հետ։ Այդ գործը գտնվում է Մասիսի քննչական կոմիտեի վարույթում։ Ռուբեն Մելիքյանը նշում է, որ ՁՊՎ-ից քննչական ուղեկցումն իրականացնում են հենց Վեդու բաժնի ծառայողները, որոնց գործընկերոջը հարվածելու համար էլ տղամարդը ձերբակալված է։ Փաստաբանը սա որակում է որպես «համակարգային բառդակ»։

Մյուս դրվագը վերաբերում է եղբոր դուստրերին սեռական բռնության ենթարկած անձանցից մեկին մարմնական վնասվածք հասցնելուն՝ ըստ տեղեկությունների՝ դանակահարելուն։ Աղջիկների օրինական ներկայացուցիչ, փաստաբան Վարդուհի Էլբակյանն ավելի վաղ հայտարարել էր, որ հորեղբոր գործողության պատճառը իրավապահների անգործությունն էր, ինչի հետևանքով նա որոշել է ինքնադատաստան տեսնել։ Ըստ փաստաբանի՝ հորեղբոր և ոստիկանի միջև բախումը տեղի է ունեցել ոստիկանության բաժնում՝ հեռախոսազրույցի ընթացքում հնչած սպառնալիքներից ու վիրավորանքներից հետո։