Քոչարյանը մեկնաբանել է Զելենսկու այցը Հայաստան

«Հայաստան» դաշինքի վարչապետի թեկնածու Ռոբերտ Քոչարյանը հայտարարել է, որ իշխանությունները, ձախողելով Արցախի հարցում, այժմ երկիրը ներքաշում են նոր արկածախնդրության մեջ։

Մայիսի 8-ին Էջմիածնում կայացած նախընտրական քարոզարշավի հանրահավաքի ժամանակ Ռոբերտ Քոչարյանն ընդգծել է, որ իշխանությունները կազմակերպել են Եվրոպական քաղաքական համայնքի գագաթնաժողովը և հրավիրել Զելենսկուն, որի կողմից հնչել են սադրիչ հայտարարություններ։ Ըստ Քոչարյանի՝ սա նոր արկածախնդրություն է, որն իրականացվում է կա՛մ Մակրոնին դուր գալու, կա՛մ այլ նպատակներով։

Քոչարյանը նշել է, որ առաջին պատճառն իշխող ուժի ասելիք չունենալն է, քանի որ նրանք ձախողվել են բոլոր բնագավառներում և այժմ պատերազմի վտանգով փորձում են համոզել հանրությանը վերընտրվելու հարցում։ Որպես երկրորդ մոտիվացիա նա մատնանշել է ցանկությունը, որ եվրոպացիներն անտեսեն Հայաստանի ներկայիս իրադարձությունները։ Վարչապետի թեկնածուի պնդմամբ՝ Փաշինյանի անձնական հետաքրքրությունները չեն համընկնում պետական շահերի հետ, և իրենք մերժում են այդ մոտեցումը։