Փաշինյանը` առողջապահության ապահովագրության չեղարկման լուրերի մասին

ՀՀ վարչապետ Նիկոլ Փաշինյանը հերքել է այն խոսակցությունները, թե հունիսին նախատեսված խորհրդարանական ընտրությունների ավարտից հետո առողջության համընդհանուր ապահովագրությունը կչեղարկվի։ Սյունիքի մարզի Սիսիան քաղաքում «Քաղաքացիական պայմանագիր» կուսակցության նախընտրական քարոզարշավի ժամանակ քաղաքացիների հետ հանդիպմանը վարչապետը նշել է:

«Չհավատա՛ք նրանց, ովքեր ասում են, թե ընտրություններից հետո առողջության ապահովագրությունը չեղարկվելու է։ Դա բացառված է»։

Առողջապահության նախարար Անահիտ Ավանեսյանն իր հերթին հավաստիացրել է, որ համակարգը ոչ միայն շարունակելու է գործել, այլև ընդլայնվելու է շահառուների նոր խմբերով։ Նախարարի խոսքով՝ առաջիկա երկու տարվա ընթացքում ապահովագրական համակարգում կներառվի երկրի ողջ բնակչությունը։ Նա նաև տեղեկացրել է, որ հաջորդ տարվա հունվարի 1-ից, անկախ վաստակած աշխատավարձի չափից, ապահովագրությանը կմիանան բոլոր աշխատող քաղաքացիները։

Հայաստանում առողջության համընդհանուր ապահովագրության ներդրումը մեկնարկել է 2026 թվականի հունվարի 1-ից՝ փուլային սկզբունքով։ Առաջին փուլի շրջանակում շահառու են դարձել 200 հազար դրամ և ավելի բարձր աշխատավարձ ստացողները, մինչև 18 տարեկան երեխաները, 65 տարեկանից բարձր թոշակառուները, ինչպես նաև հաշմանդամություն ունեցող անձինք։