Հայաստանը Վրաստանից բնական քարի արտահանման հիմնական շուկան է

2026 թվականի առաջին եռամսյակում Վրաստանից բնական քարի արտահանումը կազմել է 36,6 հազար դոլար, ինչը զիջում է նախորդ տարվա նույն ժամանակահատվածի ցուցանիշին:

Այս ցուցանիշը ցածր է 2025 թվականի առաջին եռամսյակի տվյալներից, երբ արտահանվել էր 52,5 հազար դոլարի 757 տոննա արտադրանք։ Այս մասին տեղեկացրել են վրացական լրատվամիջոցները։

2025 թվականի արդյունքներով բնական քարի իրացման հիմնական ուղղությունը Հայաստանն է եղել, որտեղ արտահանվել է 101,7 հազար դոլարի 1925 տոննա ապրանք։ Երկրորդ հորիզոնականում Չինաստանն է՝ 72,6 հազար դոլար և 647 տոննա ցուցանիշով, իսկ երրորդում Հնդկաստանն է՝ 70,4 հազար դոլար և 251 տոննա ծավալով։ Արտահանման առավել փոքր ծավալներ են ուղղվել դեպի Իտալիա (8,5 հազար դոլար/54 տոննա), Ադրբեջան (2,8 հազար դոլար/23 տոննա) և Հունաստան (8 հազար դոլար/12,5 տոննա)։

Արտահանման աշխարհագրական կառուցվածքում փոփոխություններ են արձանագրվել։ 2024 թվականին վրացական բնական քարի խոշորագույն շուկան Չինաստանն էր, որտեղ մատակարարվել էր 333 հազար դոլարի 2 544 տոննա արտադրանք։ Այդ տարի երկրորդ տեղը զբաղեցրել էր Հայաստանը՝ 63 հազար դոլարի 1 407 տոննա կրաքարի ցուցանիշով, իսկ երրորդում Իտալիան էր, ուր արտահանվել էր 11 հազար 180 դոլարի 76 տոննա քար։