Դա եղել է ամենամեծ սուտն ու կեղծիքը. Փաշինյանի հայտարարությունը

Կոռնիձորում ընթացող քարոզարշավի ժամանակ Նիկոլ Փաշինյանը հայտարարել է, որ Ղարաբաղի շարժումը եղել է ճակատագրական սխալ։

Վարչապետի խոսքով՝ Հայաստանի Հանրապետությունն իր կազմավորման առաջին իսկ օրից՝ 1991 թվականից, հայտնվել է թակարդում, որից այսօր դուրս է բերվել և դրվել զարգացման տրամաբանության վրա։ Նա ընդգծել է, որ հաղթահարվել է գոյատևման ու մաքառման փուլը։ Փաշինյանը հերքել է մինչև 2020 թվականը խաղաղություն ունենալու թեզը՝ նշելով, որ սահմանին ամեն տարի եղել են զոհեր ու վիրավորներ, և հասարակությունն ապրել է ինքնախաբեության մեջ։

«Մենք մեզ խաբել ենք, թե կարող ենք Ղարաբաղի հարցը լուծել այնպես, ինչպես հեռուստացույցներով մեզ ասել են, դա եղել է ամենամեծ սուտն ու կեղծիքը»,- ասել է նա։ 

Փաշինյանը հավելել է, որ սուտ է եղել նաև այն պնդումը, թե վատ են ապրում Ղարաբաղի պատճառով, քանի որ պատասխանատուները գիտակցել են սպասվող ծանր հետևանքները։ Նրա ձևակերպմամբ՝ Հայաստանի հաշվին Ղարաբաղում աշխատավարձերն ու թոշակներն ավելի բարձր են եղել, իսկ այդ փաստը մոռացողներին նա անվանել է «ուտող-ուրացող» և երախտամոռ։