Միջազգային քրեական դատարանի նախագահն առաջին անգամ Հայաստանում է

ՀՀ գլխավոր դատախազ Աննա Վարդապետյանը 2026 թվականի մայիսի 5-ին հյուրընկալել է Միջազգային քրեական դատարանի նախագահ Տոմոկո Ականեին: Հանդիպմանը ներկա են եղել նաև Նիդերլանդներում ՀՀ դեսպան Վիկտոր Բիյագովը, ՄՔԴ գրասենյակի ղեկավար Հիրադ Աբթահին և այլ պաշտոնյաներ:

Ողջունելով հյուրին՝ Աննա Վարդապետյանը շեշտել է, որ սա Միջազգային քրեական դատարանի գործող նախագահի առաջին այցն է Հայաստան, ինչը փաստում է կողմերի միջև գործակցությունը խորացնելու պատրաստակամությունը։

Նշենք, որ Հայաստանը 2024 թվականի փետրվարի 1-ից պաշտոնապես անդամակցում է Միջազգային քրեական դատարանին՝ դառնալով Հռոմի ստատուտին միացած 124-րդ երկիրը և 19-րդը՝ Արևելյան Եվրոպայի խմբից։

Զրույցի ընթացքում կարևորվել է ինստիտուցիոնալ գործընկերության ամրապնդումը, հատկապես միջազգային հանցագործությունների քննության բնագավառում դատախազների մասնագիտական հմտությունների զարգացումը։ Անդրադարձ է կատարվել նաև քրեական վարույթների շրջանակում ապացույցների ձեռքբերմանը, վկաների ու տուժողների պաշտպանությանը վերաբերող հարցերին։

Գլխավոր դատախազը հետաքրքրություն է հայտնել ՄՔԴ-ի հետ համատեղ վերապատրաստումներ անցկացնելու, տեխնիկական փոխգործակցությունն ընդլայնելու և փորձի փոխանակման վերաբերյալ։ Շեշտադրվել է քրեական գործերով տուժողակենտրոն մոտեցում ցուցաբերելու անհրաժեշտությունը։ Աննա Վարդապետյանն ու Տոմոկո Ականեն վերահաստատել են թափանցիկ համագործակցության մեխանիզմներ կառուցելու և երկխոսությունը շարունակելու հանձնառությունը։