Հայտնի է` երբ Նիկոլ Փաշինյանը կմեկնի նախընտրական արձակուրդի

Վարչապետ Նիկոլ Փաշինյանը Հանրապետության նախագահ Վահագն Խաչատուրյանի հետ հանդիպման ժամանակ հայտնել է, որ նախընտրական քարոզարշավին մասնակցելու նպատակով մայիսի 8-ից գտնվելու է արձակուրդում։

Վարչապետի խոսքով՝ արձակուրդը կընդհատվի միայն մայիսի 28-ին՝ պետական տոնի կապակցությամբ աշխատանքային պարտականությունների կատարման համար։ Նիկոլ Փաշինյանը շեշտել է պետական ինստիտուտների կայունության, քաղաքացիների ազատ կամքի արտահայտման և քաղաքական գաղափարների մրցակցության ապահովման կարևորությունը։ Նա համոզմունք է հայտնել, որ պետական կառույցները կկանխեն ընտրությունների վրա ապօրինի ազդեցությունները։ Վարչապետը նաև շնորհակալություն է հայտնել նախագահին բարեփոխումներին աջակցելու համար՝ նշելով, որ այժմ հանրության գնահատականի հերթն է։

Նախագահ Վահագն Խաչատուրյանը, շնորհակալություն հայտնելով տեղեկատվության համար, նշել է, որ թեև կառավարության ղեկավարի և անդամների արձակուրդ մեկնելը որոշակի անհանգստություն է առաջացնում, սակայն դա բխում է օրենքից։ Նախագահը վստահություն է հայտնել, որ իշխանությունն արել է առավելագույնը թափանցիկ ընտրություններ անցկացնելու համար։ Նա ընդգծել է, որ 2018 թվականից հետո ընտրությունների արդյունքները կասկած չեն հարուցել, հատկապես մատնանշելով 2021 թվականի արտահերթ ընտրությունները։

Վահագն Խաչատուրյանն անդրադարձել է նաև տնտեսական ձեռքբերումներին՝ նշելով հանրային արդյունքի բաշխման փոփոխությունը, անհավասարության նվազումը և տնտեսական քաղաքականության ներառականությունը։ Որպես օրինակ նախագահը հիշատակել է բնակարանաշինության ծավալների աճը և հիպոթեքային ծրագրերը։ Նա շեշտել է, որ օրենքից դուրս ոչ ոք չպետք է լինի, և խախտումները պետք է պատժվեն։ Եզրափակելով՝ նախագահը հաջողություն է մաղթել վարչապետին և քաղաքական բոլոր այն ուժերին, որոնք կգործեն օրենքի շրջանակներում՝ հույս հայտնելով, որ կհաղթի ժողովրդավարությունը։