ՏԵՍԱՆՅՈՒԹ. Բլոգերը նկարահանել է Կիրանցի դպրոցի ապաստարանը. պատգամավորի արձագանքը

Ազգային ժողովի «Հայաստան» խմբակցության պատգամավոր Լիլիթ Գալստյանը ԿԳՄՍ նախարարի և գլխավոր դատախազի ուշադրությունն է հրավիրել բլոգեր 222lava-ի կողմից Կիրանցի դպրոցի ապաստարանի նկարահանման փաստի վրա։

Խորհրդարանում ընթացող նիստի ժամանակ ընդդիմադիր պատգամավորը նշել է, որ ինչ-որ բլոգեր հայտնվել է Կիրանցի դպրոցում և նկարահանել պաշտպանության ենթակա օբյեկտ համարվող բունկերը։ Ըստ Լիլիթ Գալստյանի՝ տեղի ունեցածում առկա է անվտանգային լուրջ գործոն։ Նա հավելել է, որ տիկտոկերը նկարահանումն իրականացրել է խաղաղության քարոզչության ներքո, սակայն հնարավոր հարձակման ժամանակ երեխաների անվտանգության համար նախատեսված սենյակների տեսագրումն անթույլատրելի է։

Տարածված տեսանյութում բլոգերը մտնում է կրթական հաստատություն և հայտարարում, որ դպրոցում բունկեր է նկարում, ինչից հետո նրան ուղեկցում են ապաստարան։ «Դպրոցից 20 մետր այն կողմ Ադրբեջանի սահմանն է... էս բան ա էլի, պադվալ ա... Ստեղ երեխեքը գան... պետք է պատուհան, մի բան լինի, որ տենան»,- տեսանյութում ասում է բլոգերը։