Օրենսդրական նոր փոփոխություններ՝ Արտաքին հետախուզության ծառայության գործունեության ոլորտում

Գործադիրը փոփոխություններ եւ լրացումներ է առաջարկել «Արտաքին հետախուզական գործունեության եւ արտաքին հետախուզության ծառայության մասին», «Օպերատիվ-հետախուզական գործունեության մասին» օրենքներում եւ կից մի շարք օրենքներում:

ՀՀ արտաքին հետախուզության ծառայության պետ Քրիստիննե Գրիգորյանը տեղեկացրել է, որ Ազգային ժողովի կողմից ոլորտը կարգավորող օրենքն ընդունվելուց հետո կատարելագործման, իրավական հստակեցման կարիք ունի:

Առաջարկվում է կարգավորել ծառայության ծառայողին ավելի բարձր, հավասար կամ ավելի ցածր պաշտոնի նշանակելու կամ փոխադրելու հարաբերությունները:

ՀՀ օրենսդրությամբ նախատեսված է հայրության արձակուրդ: Առաջարկվում է ծառայության իրավահարաբերություններում եւս նման կարգավորում նախատեսել:

Առաջարկվում է զենքի եւ հատուկ միջոցների կարգը սահմանելու իրավական հիմք նախատեսել, թե որ դեպքերում ու ինչ կարգով ծառայողը զենքը եւ հատուկ միջոցները կիրառելու հնարավորություն կամ իրավունք կունենա:

Կսահմանվի պահանջ, որով ծառայության պետի եւ տեղակալի պաշտոնում կարող են նշանակվել միայն ՀՀ քաղաքացիները: Այս պահի դրությամբ երկքաղաքացիներին եւս նշանակելու իրավական հնարավորություն կա:

Ծառայությունն իրականացնում է «Հեռախոսային հաղորդակցության վերահսկում» միջոցառումը: Առաջարկվում է օրենքով թույլատրել ծառայության կողմից թվային, այդ թվում՝ հեռախոսային հաղորդակցության վերահսկման օպերատիվ-հետախուզական միջոցառումների ինքնուրույն եւ սեփական օպերատիվ-տեխնիկական ենթակառուցվածքներով կատարելու հնարավորությունը:

Հաջորդ կարգավորումները վերաբերում են կադրերի ռեզերվին, վերապատրաստումների, մասնագիտական կրթական դասընթացների դեպքում ծառայության նվազագույն ժամկետի եւ փոխհատուցման հնարավորությանը, դասային աստիճաններ նախատեսելուն, աշխատակիցների սոցիալական երաշխիքներին եւ այլն:

ԱԺ պաշտպանության եւ անվտանգության հարցերի մշտական հանձնաժողովի դրական եզրակացությունը ներկայացրել է Անդրանիկ Քոչարյանը: Հանձնաժողովի նախագահի գնահատմամբ 2022 թվականին ընդունված օրենքը մեր երկրին նոր անվտանգային կառույց ունենալու հնարավորություն է տվել: