ՏԵՍԱՆՅՈՒԹ. 5 տարի առանց վաղաժամ վերաբացման. խիստ սահմանափակումներ օնլայն կազինոների համար

Ազգային ժողովում քննարկվել է «Քաղաքացիական պայմանագիր» խմբակցության պատգամավոր Հայկ Սարգսյանի ներկայացրած օրենսդրական նախագիծը, որով առաջարկվում է փոփոխություններ կատարել «Խաղային գործունեության կարգավորման մասին» օրենքում։

Խորհրդարանը քննարկել է պատգամավոր Հայկ Սարգսյանի հեղինակած օրենսդրական նախաձեռնությունը, որը վերաբերում է խաղային ոլորտի կարգավորումներին։ Ըստ հեղինակի՝ ինտերնետ կազինոները լուրջ խնդիր են դարձել հանրության համար։ Նախագծով նախատեսվում է պարտադիր պահանջ սահմանել բոլոր օնլայն կազինոների համար՝ իրենց հավելվածներում և կայքերում տեսանելի մասում ապահովել ինքնաարգելափակման կոճակ։ Այն ակտիվացնելու դեպքում անձի մասնակցությունը խաղերին կարգելվի 5 տարի ժամկետով՝ առանց ժամկետից շուտ վերաբացման իրավունքի։ Սահմանված 5 տարին լրանալուց հետո արգելափակումն ինքնաշխատ կերկարաձգվի նույնքան ժամանակով, եթե քաղաքացին ժամկետի ավարտից 5 օր առաջ այն հանելու դիմում չներկայացնի։

Բացի այդ, նախագծով առաջարկվում է արգելել խաղերին մասնակցությունը բոլոր տեսակի նպաստառուների համար։ Հիմնավորման համաձայն՝ նպաստ ստացող անձանց ներգրավվածությունը խաղերին հակասում է սոցիալական օգնության նպատակին և ավելի է մեծացնում նրանց խոցելիությունը։ Արգելքը կտարածվի նաև այն քաղաքացիների վրա, որոնց միակ եկամուտը կենսաթոշակն է։ Զեկուցողի պարզաբանմամբ՝ միայն թոշակով ապրող անձանց միջոցները պետք է ուղղվեն կենսական կարիքներին, ինչպիսիք են սնունդը, դեղորայքը և կոմունալ ծառայությունների վճարները։