ՏԵՍԱՆՅՈՒԹ. Հայաստանի և Խորվաթիայի միջև ռազմավարական երկխոսություն կհաստատվի

Եվրոպական քաղաքական համայնքի գագաթնաժողովի շրջանակում Հայաստանի վարչապետ Նիկոլ Փաշինյանը հանդիպել է Խորվաթիայի կառավարության ղեկավար Անդրեյ Պլենկովիչի հետ։

ՀՀ վարչապետը ողջունել է Խորվաթիայի գործընկերոջ այցը Հայաստան և մասնակցությունը Եվրոպական քաղաքական համայնքի 8-րդ գագաթնաժողովին։ Նիկոլ Փաշինյանի խոսքով՝ երկու պետությունների փոխհարաբերությունները գտնվում են բարձր քաղաքական մակարդակում, ինչն այսօր ամրագրվելու է գործակցությունը ռազմավարական երկխոսության աստիճանի բարձրացմամբ։ Կառավարության ղեկավարը շեշտել է երկկողմ կապերի զարգացման զգալի ներուժը՝ հույս հայտնելով, որ դրանք կշարունակեն ընդլայնվել ու առաջընթաց ապրել։

Անդրեյ Պլենկովիչն իր հերթին շնորհակալություն է հայտնել ջերմ վերաբերմունքի և գագաթնաժողովը հյուրընկալելու համար։ Խորվաթիայի վարչապետը վստահություն է հայտնել, որ կայացած քննարկումը թարմ թափ կհաղորդի տարբեր ոլորտներում երկկողմ հարաբերությունների զարգացմանը։

Կողմերն անդրադարձել են Հայաստան-Խորվաթիա համագործակցության հետագա խորացմանն առնչվող հարցերի, ինչպես նաև տարածաշրջանային տարբեր թեմաների։ Հանդիպման ավարտին Նիկոլ Փաշինյանը և Անդրեյ Պլենկովիչը ստորագրել են Հայաստանի Հանրապետության և Խորվաթիայի Հանրապետության միջև ռազմավարական երկխոսության մասին համատեղ հռչակագիր։