ԵՄ-ն փորձագետների խումբ կուղարկի Հայաստան Ռուսաստանի միջամտությանը դիմակայելու համար

Եվրոպական միությունը փորձագետների խումբ է ուղարկում Հայաստան, որոնք մասնագիտացած են ռուսական քարոզչության և միջամտության դեմ պայքարում, քանի որ քաղաքական լարված շրջանում ավելացնում է իր աջակցությունը նախկին խորհրդային հանրապետությանը: Այս մասին գրում է The Guardian-ը:

Իրադարձությունների խորհրդանշական հաջորդականությամբ՝ Երևանում շուրջ 45 առաջնորդների մասնակցությամբ Եվրոպական քաղաքական համայնքի գագաթնաժողովից հետո, ԵՄ առաջնորդները երեքշաբթի օրը կանցկացնեն իրենց առաջին գագաթնաժողովը Հայաստանի հետ:

ԵՄ-ն խորացնում է կապերը Հայաստանի հետ, քանի որ ռուսական ազդեցությունը թուլացել է Ուկրաինա լայնամասշտաբ ներխուժումից ի վեր, ինչը դիտարկվում է որպես Մոսկվայի ուշադրության շեղում այն երկրներից, որոնց նա համարում է իր «մերձավոր արտասահման»:

Երեքշաբթի օրը սպասվում է, որ Հայաստանի վարչապետ Նիկոլ Փաշինյանը և ԵՄ առաջնորդներ Ուրսուլա ֆոն դեր Լայենն ու Անտոնիու Կոշտան Երևանում կայանալիք գագաթնաժողովում պաշտոնապես կողջունեն Հայաստանում օտարերկրյա միջամտությանը հակազդելու ԵՄ առաքելության հայեցակարգը, որտեղ նրանք կքննարկեն նաև էներգետիկայի, տրանսպորտի և տնտեսական աջակցության հարցեր:

ԵՄ-ն ձևավորում է 20-30 քաղաքացիական փորձագետներից բաղկացած թիմ՝ Հայաստանում տեղակայված երկամյա առաքելության համար, որի նպատակն է բարելավել արձագանքը ռուսական կիբերհարձակումներին, տեղեկատվական մանիպուլյացիաներին և միջամտություններին, ինչպես նաև հակազդել ապօրինի ֆինանսական հոսքերին: Ակնկալվում է, որ առաքելությունը, որի անձնակազմի թիվը և տևողությունը կարող են ավելացվել, աշխատանքը կսկսի հունիսի 7-ին կայանալիք խորհրդարանական ընտրություններից հետո,- գրում է  The Guardian: