Զելենսկին պատժամիջոցներ է սահմանել իր գրասենյակի նախկին ղեկավարի նկատմամբ

Ուկրաինայի նախագահ Վլադիմիր Զելենսկին ստորագրել է իր գրասենյակի նախկին ղեկավար Անդրեյ Բոգդանի դեմ պատժամիջոցներ կիրառելու հրամանագիրը։

Նախագահի պաշտոնական կայքում զետեղված փաստաթղթի համաձայն՝ Բոգդանի դեմ սահմանված սահմանափակումները կգործեն տասը տարի ժամկետով։ Միակ բացառությունը պետական պարգևներից զրկումն է, որն իրականացվում է անժամկետ հիմունքներով։

Կիրառվող պատժամիջոցների ցանկում ներառված են Ուկրաինայի տարածքում առկա ակտիվների սառեցումը, տրամադրված լիցենզիաների չեղարկումն ու պաշտոնական այցերի չեղյալ հայտարարումը։ Բացի այդ, արգելվում է մտավոր սեփականության օբյեկտների փոխանցումը, ինչպես նաև դադարեցվում են առևտրային պայմանագրերը, գիտական համագործակցությունը և մշակութային փոխանակումները։

Ըստ հրապարակված փաստաթղթի՝ Անդրեյ Բոգդանի գործունեությունը վտանգ է ներկայացնում Ուկրաինայի ազգային շահերի, անվտանգության, ինչպես նաև պետության ինքնիշխանության ու տարածքային ամբողջականության համար։