Նախազգուշացում ԱՄՆ–ից. կարող է դառնալ պատժամիջոցների հիմք

Միացյալ Նահանգների ֆինանսների նախարարությունը տեղեկացրել է ծովային փոխադրողներին, որ Հորմուզի նեղուցով անցնելու համար Իրանին վճարվող գումարները կարող են դառնալ պատժամիջոցների հիմք։

ԱՄՆ ֆինանսների նախարարության Օտարերկրյա ակտիվների վերահսկողության վարչությունը (OFAC) հրապարակել է հատուկ նախազգուշացում՝ ուղղված ծովային արդյունաբերության ներկայացուցիչներին։ Ըստ հաղորդագրության՝ իրանական վարչակարգի կողմից Հորմուզի նեղուցով անվտանգ նավարկությունն ապահովելու դիմաց պահանջվող «տուրքերի» վճարումը ռիսկային է և կարող է հանգեցնել սանկցիաների կիրառման։ Իրանը կարող է նման վճարումներ պահանջել տարբեր եղանակներով՝ ֆիատ արժույթով, թվային ակտիվներով, ինչպես նաև ոչ ֆորմալ սվոփերի, փոխհաշվարկների կամ բնաիրային ձևերով։ Որպես այդպիսին կարող են ներկայացվել նաև անվանապես բարեգործական նվիրատվությունները «Բոնյադ Մոստազաֆան» հիմնադրամին, Իրանի Կարմիր մահիկի ընկերությանը կամ երկրի դեսպանատների հաշվեհամարներին։

Գերատեսչությունը X-ի իր միկրոբլոգում շեշտել է, որ Ֆինանսների նախարարությունը պատրաստ է անհապաղ միջոցներ ձեռնարկել բոլոր այն կողմերի նկատմամբ, որոնք «տուրքերի» վճարման կամ այլ եղանակով աջակցություն են ցուցաբերում իրանական զինվորականներին։ Ծովային ծառայություններ մատուցող ընկերություններին հորդորվել է իրականացնել խստացված ստուգումներ Հորմուզի նեղուցով կատարվող տարանցիկ փոխադրումների վերաբերյալ։