Հաջիևը խոսել է Հայաստանի և Ադրբեջանի հարաբերություններից

Հիքմեթ Հաջիևը հայտարարել է, որ Ադրբեջանը բարեկամական ու բարիդրացիական հարաբերություններ է հաստատել իր բոլոր հարևանների, այդ թվում՝ Հայաստանի հետ։

Ադրբեջանի նախագահի օգնական Հիքմեթ Հաջիևը, ելույթ ունենալով Ստեփանակերտի համալսարանում դիվանագիտական կորպուսի ներկայացուցիչների առջև, անդրադարձել է տարածաշրջանային հարաբերություններին։ Ըստ ադրբեջանական լրատվամիջոցների՝ նա նշել է, որ իրենց երկիրը ձգտում է խաղաղ ապագայի թե՛ Ադրբեջանի, թե՛ ողջ տարածաշրջանի համար։

Հաջիևի խոսքով՝ Բաքվի արտաքին քաղաքական հայեցակարգի գլխավոր առաջնահերթությունը բոլոր հարևան երկրների հետ խաղաղ և բարիդրացիական կապերի պահպանումն է։ Նախագահի օգնականն ընդգծել է, որ նախկինում պատերազմական վիճակը խոչընդոտում էր այդ նպատակի լիարժեք իրագործմանը։

«Սակայն այսօր գոհունակությամբ կարող եմ ասել, որ Ադրբեջանը բարեկամական և բարիդրացիական հարաբերություններ ունի իր բոլոր հարևանների, այդ թվում՝ Հայաստանի Հանրապետության հետ»,- հավելել է պաշտոնյան։

Բացի այդ, Հիքմեթ Հաջիևն անդրադարձել է Մուստաֆաևի գլխավորած պատվիրակության այցին Հայաստան՝ այն որակելով որպես պատմական իրադարձություն։