Ադրբեջանը դադարեցնում է համագործակցությունը Եվրախորհրդարանի հետ բոլոր ուղղություններով

Ադրբեջանի Միլի մեջլիսը որոշում է կայացրել դադարեցնել փոխգործակցությունը Եվրախորհրդարանի հետ և սկսել «Եվրանեսթի» վեհաժողովից դուրս գալու գործընթացը։

Ադրբեջանի խորհրդարանը որոշել է բոլոր ուղղություններով կասեցնել համագործակցությունը Եվրախորհրդարանի հետ։ Մասնավորապես, դադարեցվում է մասնակցությունը ԵՄ-Ադրբեջան խորհրդարանական համագործակցության հանձնաժողովին, ինչպես նաև մեկնարկում է «Եվրանեսթի» խորհրդարանական վեհաժողովից դուրս գալու պաշտոնական ընթացակարգը։

Նախքան այս որոշումը, Ադրբեջանի արտաքին գործերի նախարարություն էր կանչվել Բաքվում Եվրոպական միության դեսպան Մարիանա Կույունջիչը։ Նրան բողոքի նոտա է փոխանցվել ապրիլի 30-ին Եվրախորհրդարանի կողմից ընդունված բանաձևի առնչությամբ։ Ադրբեջանի արտաքին քաղաքական գերատեսչության պնդմամբ՝ Եվրոպական խորհրդարանի դիրքորոշումները բացասական ազդեցություն են ունենում տարածաշրջանային կարգավորման գործընթացի, ինչպես նաև Ադրբեջանի և ԵՄ հարաբերությունների հետագա հեռանկարների վրա։