Ռուսաստանի ԱԳՆ-ն պարզաբանումներ է պահանջել Գերմանիայից

Ռուսաստանի ԱԳՆ ներկայացուցիչը Բեռլինից պարզաբանումներ է պահանջել տնտեսական քաղաքականության և ռազմական կարիքներին հարմարվելու պատճառների վերաբերյալ։

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան նշել է, որ Գերմանիայի իշխանությունները պետք է ընդունեն Ռուսաստանի նկատմամբ վերջին տարիներին վարած կուրսի տապալումը։ Դիվանագետի խոսքով՝ Բեռլինը պարտավոր է սեփական հանրությանը բացատրել երկրի տնտեսությունը «ռազմական ռելսերի» փոխադրելու դրդապատճառները և դրա ազդեցությունը պետության վրա։

Այս տեսակետը Զախարովան հայտնել է «Sputnik» ռադիոկայանի եթերում՝ անդրադառնալով գերմանական ավտոարտադրողների կողմից գործարանները ռազմական արտադրանքի համար վերափոխելու մասին լուրերին։ Նա շեշտել է, որ 2014 թվականից որդեգրված արտաքին քաղաքականությունը բացասական հետևանքներ է ունեցել հենց Գերմանիայի համար, իսկ ներկայիս միլիտարիզացիան փորձ է՝ թաքցնելու նախկինում գործած սխալները։

Հարկ է նշել, որ «Financial Times»-ն ավելի վաղ հաղորդել էր «Volkswagen»-ի և իսրայելական «Rafael Advanced Defence Systems» պաշտպանական կոնցեռնի հնարավոր գործակցության մասին։ Ըստ թերթի՝ Օսնաբրյուկի գործարանը կարող է օգտագործվել «Երկաթե գմբեթ» ՀՕՊ համակարգի բաղադրիչների արտադրության նպատակով։ Այդուհանդերձ, «Volkswagen»-ի կողմից այս տեղեկատվությունը հերքվել է՝ հայտարարելով, որ իրենց ձեռնարկություններում զենքի թողարկումը բացառված է։