Երևանը կդառնա «Եվրոպայի բաբախող սիրտը». Ֆրանսիայի ԱԳ նախարար

Նոր դեսպանության բացումը դիվանագիտական կարևոր առաքելություն է, որը ներկայացնում է պետությունը, պաշտպանում քաղաքացիներին և զարգացնում երկկողմ հարաբերությունները բոլոր ոլորտներում։ Ըստ Ֆրանսիայի արտաքին գործերի նախարարի՝ դեսպանությունը կամուրջ է երկու ժողովուրդների միջև, որտեղ մարդիկ սովորում են հասկանալ միմյանց և կիսել մշակութային արժեքները։ Ժան-Նոել Բարոն համոզմունք է հայտնել, որ այս նոր կենտրոնը կդառնա Ֆրանսիայի և Հայաստանի միջև փոխանակումների կենսունակ վայր։

Նախարարը տեղեկացրել է, որ մի քանի օրից Ֆրանսիայի նախագահը պետական այցով կմեկնի Հայաստան, ինչը կխորհրդանշի երկու երկրների կապերի բացառիկ ամրապնդումը։ Նա նշել է, որ Երևանը կդառնա «Եվրոպայի բաբախող սիրտը»՝ հյուրընկալելով Եվրոպական քաղաքական համայնքի և Հայաստան-ԵՄ առաջին գագաթնաժողովները։ Այս իրադարձությունները փաստում են ապագայի հանդեպ երկու երկրների ընդհանուր վճռականությունը։

Բարոն ընդգծել է Հայաստանի համարձակ հանձնառությունը Ադրբեջանի հետ խաղաղության հարցում, ինչը նոր հորիզոններ է բացում Հարավային Կովկասի անվտանգության և բարգավաճման համար։ Ֆրանսիան ողջունում է այս քայլը՝ Ուկրաինայում և Մերձավոր Արևելքում շարունակվող պատերազմների ֆոնին։

Անդրադառնալով պատմական հիշողությանը՝ նախարարը նշել է, որ Հայոց ցեղասպանության հիշատակի օրվանից օրեր անց Ֆրանսիան հարգում է զոհերի հիշատակը, որը համամարդկային խղճի հարց է։ Նա հիշեցրել է 1915 թվականին ծովակալ Դարտիժ դյու Ֆուրնեի կողմից Մուսա լեռան 4000 հայերի փրկությունը և Միսաք ու Մելինե Մանուշյանների քաջությունը, որոնք այժմ հանգչում են Պանթեոնում։

Դեսպանության նոր շենքը կապված է նաև Ֆրանսիայի պատմության հետ․ այստեղ ավելի քան 60 տարի ապրել է նախագահ Վալերի Ժիսկար դ'Էստենը։ 2026 թվականին կնշվի նրա ծննդյան հարյուրամյակը, և Բարոն հարգանքի տուրք է մատուցել եվրոպական արժեքների ջատագով նախկին նախագահին։ Նա մաղթել է, որ այս տունն ու այգին դառնան Հայաստանի օջախը Փարիզում և երկու երկրների բարեկամության խորհրդանիշը։