18:00 Լուրերը մեկ տողով. Պատմական շրջադարձ հայ-թուրքական հարաբերություններում, էներգետիկ ցնցում աշխարհում և վիրուսներ խմելու ջրում

Անցած ժամվա լուրերը՝ հակիրճ և բովանդակային.


•Հայաստանն ու Թուրքիան սկսում են Կարս-Գյումրի երկաթգծի վերականգնման գործընթացը: Կարսում կայացած պաշտոնական հանդիպման ժամանակ ձևավորվել է համատեղ աշխատանքային խումբ՝ տարածաշրջանային կապուղիների բացման նպատակով։

•Բյուրեղավանի խմելու ջրի աղտոտման փաստով հարուցվել է քրեական վարույթ: Չնայած «Վեոլիա Ջուր»-ի հերքումներին, լաբորատոր հետազոտությունը ջրում վտանգավոր բակտերիաներ և վիրուսներ է հայտնաբերել։

•Դժվար է գտնվել թե՛ իշխանության, թե՛ որոշ ընդդիմադիր ուժերի քննադատության թիրախում, բայց դա անխուսափելի է, մենք արդեն սովորել ենք դրան. «Հայաստան» դաշինքի պատգամավոր Քրիստինե Վարդանյան:

•ԵՄ դիվանագետները հետևում են Հայաստանի նախընտրական գործընթացներին: Վասիլիս Մարագոսի գլխավորած պատվիրակությունը այցելել է ԿԸՀ՝ ծանոթանալու ԱԺ հերթական ընտրությունների նախապատրաստական աշխատանքներին։

•Իրանը դադարեցրել է պողպատե արտադրանքի արտահանումը երկրից: Որոշումը կայացվել է պատերազմական գործողությունների հետևանքով արդյունաբերական օբյեկտներին հասցված վնասների և ներքին կարիքների ապահովման նպատակով։

•ԱՄԷ-ն դուրս է գալիս OPEC-ի կազմից՝ քննադատելով դաշնակիցների թույլ դիրքորոշումը: Էմիրությունները դժգոհ են իրանական հարձակումների ժամանակ արաբական երկրների ցուցաբերած պասիվ պաշտպանական քաղաքականությունից։

•Վիեննայում Թեյլոր Սվիֆթի համերգին ծրագրված ահաբեկչության գործով նոր մանրամասներ են պարզվել: Գլխավոր կասկածյալը դատարանում ընդունել է մեղքը՝ հաստատելով ջիհադիստական հարձակում իրականացնելու իր մտադրությունը։