Հայտնի է` ինչ է Զելենսկին պահանջել Մերցից. BZ

Ուկրաինայի նախագահ Վլադիմիր Զելենսկին Բեռլին կատարած այցի ժամանակ Գերմանիայի կանցլեր Ֆրիդրիխ Մերցից պահանջել է հնարավորինս արագ Կիևին տրամադրել 90 միլիարդ եվրոյի օգնություն, հայտնում է Berliner Zeitung-ը (BZ):

Հրատարակության տվյալներով՝ Բեռլինը Կիևի կողմից դիտարկվում է որպես առանցքային խաղացող, որն ընդունակ է ապահովել ԵՄ-ում որոշման կայացումը: Մերցն ավելի վաղ լավատեսություն էր հայտնել, որ օգնության արգելափակումը կարող է հանվել Հունգարիայում իշխանափոխությունից հետո:

Ուկրաինան ձգտում է հասանելիություն ստանալ միջոցներին, որոնցից մոտ 60 միլիարդ եվրոն նախատեսվում է ուղղել Ուկրաինայի զինված ուժերի ֆինանսավորմանը 2026–2027 թվականներին: Օգնության փաթեթը մի քանի ամիս շարունակ արգելափակում էր Հունգարիայի նախկին վարչապետ Վիկտոր Օրբանը: Ընտրություններում նրա պարտությունից և Պետեր Մադյարի հաղթանակից հետո Կիևում հույս ունեն որոշման արագացման հարցում:

Ուկրաինայի առաջնորդի այցը մինչև վերջին պահը գաղտնի է պահվել, ասվում է հոդվածում: Զելենսկին Գերմանիայի մայրաքաղաք է ժամանել նախարարների ուղեկցությամբ և գերմանական մայրաքաղաքում անցկացրել է մոտ երկու ժամ՝ ներառյալ բանակցությունները և համատեղ մամուլի ասուլիսը:

Բացի այդ, Բեռլինում տեղի են ունեցել նաև վերջին ավելի քան 20 տարվա ընթացքում առաջին գերմանա-ուկրաինական միջկառավարական խորհրդակցությունները: Մասնավորապես, Գերմանիայի պաշտպանության նախարար Բորիս Պիստորիուսը հանդիպում է անցկացրել ուկրաինացի գործընկեր Միխայիլ Ֆեդորովի հետ: Ֆինանսական օգնությունից բացի, կողմերը քննարկել են ռազմական համագործակցությունը, այդ թվում՝ հակաօդային պաշտպանության համատեղ համակարգերի ստեղծումը, ինչպես նաև Ուկրաինայի վերականգնումն ու փախստականների վերադարձը: