ՏԵՍԱՆՅՈՒԹ. Մանրամասներ Մրգաշեն գյուղում տեղի ունեցած դանակահարությունից

Մրգաշեն գյուղում այսօր տեղի ունեցած դանակահարության հետևանքով սպանվել է տեղի ատամնաբույժը, որին հարվածել են իր տան դիմաց։

Այս մասին լրատվամիջոցներին հայտնել է բնակավայրի վարչական ղեկավար Սիրեկան Հարությունյանը։ Նրա խոսքով՝ սպանվածը Արթուր Ավագյանն էր, ով ուներ երեք անչափահաս երեխա և ամուսնացած էր։ Տուժածին տարածաշրջանում շատերն էին ճանաչում։ Ընտանիքն ընդամենը մի քանի ամիս առաջ էր տեղափոխվել նոր տուն, իսկ մինչ այդ բնակվում էին հայրական տանը։

Դեպքի ժամանակ տանը եղել է Արթուրի կինը, ով այժմ շոկային վիճակում է և կատարվածի վերաբերյալ կցկտուր տեղեկություններ է հայտնում։ «Կինը շոկի մեջ է, կցկտուր բաներ է պատմում տեղի ունեցածի մասին․ մեկ ասում է՝ կանչեցին, դուրս եկավ, մեկ էլ ասում է՝ զանգեցին, դուրս եկավ։ Արթուրը դուրս է եկել, 10 րոպե հետո բակի շունը նրա ոտնամանը ներս է տարել, կինը հասկացել է, որ մի բան այն չէ։ Դուրս են եկել, տեսել են բակում ընկած»,– պատմել է Սիրեկան Հարությունյանը։