Իրանը սկսում է լայնածավալ մոբիլիզացիա. WSJ

Իրանը նախաձեռնել է զանգվածային մոբիլիզացիա՝ կապված Մերձավոր Արևելքում ամերիկյան զինուժի ակտիվացման հետ։ Այս մասին հայտնում է The Wall Street Journal-ը` նշելով, որ երկրի իշխանությունները սկսել են ներգրավել քաղաքացիների լայն շրջանակներ՝ ներառյալ անչափահասների:

«Իրանը պատրաստվում է կատաղի մարտերի»,- գրել է լրատվականը:

Նշվում է, որ մարտի 29-ից իրականացվող ծրագրի շրջանակում կամավորները կարող են ներգրավվել բժշկական աջակցություն տրամադրելու, անցակետերի պահպանության և սննդի պատրաստման աշխատանքներում։ Ռազմական վերլուծաբանների գնահատմամբ՝ Իրանում կա մոտ մեկ միլիոն ակտիվ և պահեստազորային զինծառայող, որոնցից շուրջ 190 հազարը պատկանում են Իսլամական հեղափոխության պահապանների կորպուսին։

Հրապարակման մեջ նշվում է, որ նախաձեռնությունը որոշակի նմանություններ ունի 1980-ականների Իրաքի հետ պատերազմի ժամանակ կիրառված մոբիլիզացիոն մեթոդների հետ, երբ ներգրավվում էին նաև անչափահասներ։ Վերլուծաբանների կարծիքով՝ ԱՄՆ-ի հնարավոր ցամաքային գործողության դեպքում Իրանը կարող է ընդլայնել հարվածների աշխարհագրությունը՝ թիրախավորելով նավթային հարթակներ, էլեկտրակայաններ և այլ ռազմավարական ենթակառուցվածքներ։

Միևնույն ժամանակ, լրատվամիջոցը գրում է, որ ԱՄՆ-ն դիտարկում է Իրանի ուղղությամբ ցամաքային գործողության տարբերակը և զորքերի տեղակայումը երկրի սահմանների ու Խարգ կղզու մոտ։ Իրանի խորհրդարանի նախագահ Մոհամմադ Բաղեր Ղալիբաֆը հայտարարել է, որ շուրջ յոթ միլիոն մարդ պատրաստ է կամավոր կերպով մասնակցել երկրի պաշտպանությանը։