ԻՀՊԿ-ն արձագանքել է Թրամփի սպառնալիքներին

Իրանի Իսլամական հեղափոխության պահապանների կորպուսը պատասխանել է ԱՄՆ նախագահ Դոնալդ Թրամփի հայտարարությանը՝ կապված Իրանին «քարե դար» վերադարձնելու սպառնալիքի հետ։ Bloomberg-ի փոխանցմամբ՝ կորպուսի Օդային-տիեզերական ուժերի հրամանատար Մաջիդ Մուսավին գրառում է կատարել X-ում։

«Ձեր հոլիվուդյան խաբկանքներն այնքան են խաթարել ձեր մտածողությունը, որ դուք, ունենալով 250-ամյա չնչին պատմություն, սպառնում եք քաղաքակրթության, որն ավելի քան 6000 տարեկան է»,- գրել է Մուսավին։ 

Հիշեցնենք՝ Միացյալ Նահանգների նախագահ Դոնալդ Թրամփը հանդես էր եկել ուղերձով՝ հայտարարելով, որ ԱՄՆ զինված ուժերը հասել են իրենց նպատակներին։ Թրամփը, առանց ժամկետներ նշելու, հայտնել է, որ ԱՄՆ-ն «շատ արագ» կավարտի աշխատանքը։ 

«Մենք նրանց չափազանց ուժեղ հարվածելու ենք հաջորդ երկու-երեք շաբաթվա ընթացքում։ Մենք նրանց վերադարձնելու ենք քարե դար»,- հայտարարել էր ԱՄՆ նախագահը։