Լուրերը մեկ տողով. Արտակարգ դեպք երեխայի հետ, Հորմուզի շուրջ լարվածություն և առատ ձյուն Հայաստանում

Անցած ժամվա լուրերը՝ հակիրճ և բովանդակային.

 • Արարատի մարզից 1 տարեկան 2 ամսական երեխա «կլինիկական մահ» ախտորոշմամբ տեղափոխվել է «Արաբկիր» ԲԿ։ Բժիշկներին հաջողվել է վերականգնել սրտի աշխատանքը, սակայն երեխան ծայրահեղ ծանր վիճակում է, և կա կասկած, որ նրան ծեծի է ենթարկել ծնողներից մեկը։

• Իսրայելի բանակը թիրախային ցամաքային գործողություններ է սկսել Լիբանանի հարավում՝ նպատակ ունենալով ոչնչացնել զինյալների ենթակառուցվածքներն ու ընդլայնել պաշտպանության գիծը։ Գործողություններից առաջ նախատեսվում են հրետանային և ավիացիոն հարվածներ։

• Մի շարք երկրներ, այդ թվում Մեծ Բրիտանիան, Ֆրանսիան, Գերմանիան և այլ պետություններ, հրաժարվում են նավեր ուղարկել Հորմուզի նեղուց՝ ԱՄՆ նախաձեռնած առաքելությանը մասնակցելու համար։ Միաժամանակ ԱՄՆ-ը շարունակում է պլանավորել նավերի ուղեկցման միջազգային կոալիցիայի ստեղծումը։

• ԵՄ արտաքին գործերի նախարարները քննարկում են Հորմուզի նեղուց ռազմական նավեր ուղարկելու հնարավորությունը։ Դրա համար կարող է ընդլայնվել Կարմիր ծովում գործող եվրոպական Aspides ռազմածովային առաքելության մանդատը։

• Դուբայի միջազգային օդանավակայանում չվերթները վերսկսվել են անօդաչու սարքի հարվածից հետո առաջացած հրդեհից հետո։ Վառելիքի ամբարը վնասվել էր, սակայն հրդեհը մեկուսացվել է և տուժածներ չկան։

• Միջերկրական ծովից ներթափանցած ցիկլոնի պատճառով Հայաստանի մի շարք շրջաններում գրանցվել են առատ տեղումներ և մեծ ձնածածկ։ Առաջիկա օրերին սպասվում է նոր ցիկլոն և ջերմաստիճանի աստիճանական բարձրացում։

• Ստրասբուրգում լրագրողների հարցմանը մի շարք եվրոպացի պատգամավորներ չեն կարողացել քարտեզի վրա ցույց տալ Իրանի տեղը։ Դեպքը լայն արձագանք է ստացել սոցիալական ցանցերում։