Լուրերը մեկ տողով. Պայթյուններ, հարվածներ, ՀՀ քաղաքական պայքար և վարորդական վկայական

Անցած ժամվա լուրերը՝ հակիրճ և բովանդակային.

• ՆԳՆ-ից հայտնում են, որ վարորդական վկայական ստանալու համար դիմած քաղաքացիների սպասարկումը արագացնելու նպատակով մարտ ամսվա բոլոր շաբաթ օրերը հաշվառման-քննական ստորաբաժանումներում հայտարարվել են աշխատանքային։

• Նոր տեխնիկական լուծումներ են ներդրվել հերթագրման համակարգում, ինչի շնորհիվ հերթերը արդեն զգալիորեն նվազել են։

• ՀՀ վարչապետ Նիկոլ Փաշինյանի գլխավորությամբ կառավարությունն անցկացրել է հերթական նիստը։ Փաշինյանը նշել է, որ Հայաստանը պետք է պաշտպանել շատ ամուր և սկզբունքային, քանի որ ձևավորվել է հեռանկար ունեցող պետություն։

• Վարչապետի խոսքով՝ Հայաստանը հասել է կարևոր նվաճումների և հաղթահարել է ուրիշների կողմից պարտադրված հայրենասիրության մոդելները՝ իրականացնելով «Մենք ենք տերը մեր երկրի» սկզբունքը։

• Ադրբեջանի նախագահ Իլհամ Ալիևը հայտարարել է, որ Հայաստանի և Ադրբեջանի միջև խաղաղությունը գոյություն ունի ոչ միայն թղթի վրա, այլ նաև գործնականում։ Նրա խոսքով՝ սահմանին հրաձգություններ այլևս չեն լինում։

• Ալիևը նաև նշել է, որ Ադրբեջանը սկսել է առևտուրը Հայաստանի հետ և հանել է դեպի Հայաստան բեռների փոխադրման սահմանափակումները։

• Ադրբեջանի նախագահի խոսքով՝ Հայաստանը իր անկախության պատմության մեջ առաջին անգամ կարող է դառնալ տարանցիկ երկիր։

• ՀՀ կառավարությունը հաստատել է համաձայնագիր, որով ԿԸՀ-ն Ազգային ժողովի ընտրություններին ընդառաջ 545 մլն դրամով տեսախցիկներ կգնի ընտրատեղամասերի համար։

• Ընտրական օրենսգրքի համաձայն՝ տեսանկարահանումը կիրականացվի 300-ից ավելի ընտրող ունեցող մոտ 1800 ընտրատեղամասերում։

• Հնդկաստանի մայրաքաղաք Դելիում ձկան շուկայի հարևանությամբ բռնկված հրդեհի հետևանքով այրվել է առնվազն 400 հյուղակ, սակայն տուժածներ չկան։

• Միջազգային խոշոր բանկերը իրենց աշխատակիցներին խորհուրդ են տվել ժամանակավորապես չայցելել Դուբայի և Կատարի գրասենյակներ՝ տարածաշրջանում աճող լարվածության պատճառով։

• ԱՄՆ բանակի նախկին զինծառայողի խոսքով՝ Իրանը ունի տեխնոլոգիաներ և ԱԹՍ-ներ, որոնք տեսականորեն կարող են հարվածներ հասցնել անգամ ԱՄՆ-ի օբյեկտներին, այդ թվում՝ Կալիֆոռնիայում։

• ԱՄՆ-ն և Իսրայելը հարվածներ են հասցրել Իրանի մայրաքաղաք Թեհրանից հարավ գտնվող Ռոբաթ Քարիմ արդյունաբերական գոտուն։ Վնասների մասին տվյալներ դեռ չկան։

• Օդային հարձակման է ենթարկվել նաև Իրանի Սպահան քաղաքում գտնվող ավիացիոն քոլեջը․ քաղաքում լսվել են պայթյուններ։

• Կրասնոդարի երկրամասում անօդաչու թռչող սարքերի հարձակման հետևանքով հրդեհ է բռնկվել նավթամբարում։ Տուժածներ չկան, հրդեհի տարածքը կազմել է մոտ 150 քմ։