Լուրերը մեկ տողով. Պատերազմի 12-րդ օրը․ հարվածներ, նավթային շուկայի ցնցում. ՀՀ ՊՆ-ն կեղծ լուրերի մասին

Անցած ժամվա լուրերը՝ հակիրճ և բովանդակային.

• Մերձավոր Արևելքում շարունակվող պատերազմի ֆոնին տարածաշրջանային լարվածությունը աճում է, իսկ միջազգային հանրությունը կոչ է անում զսպվածության և խաղաղության։

• Պատերազմի 12-րդ օրը միջազգային մամուլը նշում է, որ Իրանի և Իսրայելի հակամարտության առաջին փուլում կողմերից ոչ մեկը չի հասել իր հիմնական նպատակներին։

• Եվրահանձնաժողովի տվյալներով՝ Մերձավոր Արևելքում սրման պատճառով ԵՄ-ում գազի գները աճել են մոտ 90%-ով, իսկ նավթի գները՝ շուրջ 40%-ով։

• ԱՄՆ սենատոր Քրիս Մերֆին հայտարարել է, որ Իրանի ստորգետնյա միջուկային ծրագրի մեծ մասը հնարավոր չէ ոչնչացնել առանց ցամաքային ներխուժման։

• Սենատոր Ռիչարդ Բլումենտալը չի բացառել Իրանի տարածքում ամերիկյան զորքերի տեղակայման հնարավորության քննարկումը։

• Իսրայելական Ynet-ը գրում է, որ Իրանի դեմ պատերազմը կարող է շարունակվել առնվազն ևս երկու շաբաթ և դժվար թե ավարտվի ռեժիմի տապալմամբ։

• Reuters-ի տվյալներով՝ Իրանի հետ հակամարտության ընթացքում վիրավորվել է մոտ 150 ամերիկացի զինծառայող։

• Իրանի Սպահան քաղաքում հարձակման հետևանքով վնասվել է Ռուսաստանի գլխավոր հյուպատոսության շենքը, ինչը Մոսկվան անվանել է միջազգային իրավունքի խախտում։

• Իրաքյան Քուրդիստանից շնորհավորանք են փոխանցել Մոջթաբա Խամենեին՝ ընդգծելով Իրանի հետ հարաբերությունների կարևորությունը։

• Քուրդ հրամանատար է նշանակվել Սիրիայի պաշտպանության նախարարի տեղակալ։

• Իսրայելի բանակը հայտարարել է Լիբանանի «Հեզբոլլահ» շարժման «Նասր» ստորաբաժանման հրամանատարի ոչնչացման մասին։

• Ամերիկյան հետախուզությունը տեղեկություններ ունի, որ Իրանը կարող է ականապատել Հորմուզի նեղուցի նավագնացության միջանցքները։

• Պակիստանի ռազմածովային ուժերը հայտնել են, որ Հորմուզի նեղուցի շրջանից ապահով ուղեկցել են նավթային բեռներով նավերը դեպի անվտանգ ջրեր։

• «Մոսադի» նախկին աշխատակիցը հայտարարել է, որ Իրանում արդեն իրականացվել են գաղտնի գործողություններ, որոնց մասին աշխարհը դեռ կիմանա։

• Իսրայելի բանակը սկսել է Թեհրանում ռազմական ենթակառուցվածքների դեմ հարվածների նոր լայնածավալ ալիք։

• ԱՄՆ-ն Հորմուզի նեղուցի մոտ ոչնչացրել է Իրանի մի քանի ռազմական նավ, այդ թվում՝ 16 ականազերծող։

• Սաուդյան Արաբիան ցանկանում է ձեռք բերել ուկրաինական հակադրոնային համակարգեր՝ իրանական «Շահեդ» դրոններին հակազդելու համար։

• Իրանի քաղաքացիները հայտնում են «Սեպահ» և «Մելլի» բանկերի բազմաթիվ հաշիվների արգելափակման մասին, ինչը իշխանությունները բացատրում են տեխնիկական արդիականացմամբ։

• Ռեջեփ Թայիփ Էրդողանը հայտարարել է, որ հակասեմիտիզմն ու իսլամաֆոբիան մարդկության դեմ ուղղված հանցագործություններ են։

• Իրանի Արևելյան Ադրբեջան նահանգում պայթյուններ են տեղի ունեցել դատարանի և ոստիկանության շենքի մոտ։

• Իրանի պետական լրատվամիջոցները հայտնում են Բաղդադում գտնվող ամերիկյան «Վիկտորիա» ռազմաբազայի ուղղությամբ հարվածի մասին։

• Իրանը հրթիռային հարվածներ է հասցրել Իսրայելի մի շարք քաղաքների, Հայֆայում հարվածից հետո այրվել է էլեկտրակայան։

• Սպիտակ տան մամուլի քարտուղարը հայտնել է, որ ԱՄՆ-ը քննարկում է որոշ երկրների նավթային սեկտորի նկատմամբ պատժամիջոցների թուլացումը։

• Իրանը մերժում է հրադադարի նախաձեռնությունները և պահանջում անվտանգության երաշխիքներ, փոխհատուցում ու միջուկային վառելիքի լիարժեք ցիկլի իրավունք։

• Ռուսաստանն ու Ուկրաինան շարունակում են փոխադարձ հարվածները, իսկ ԱՄՆ-ը Ուկրաինային կմատակարարի հեռահար ռադարային համակարգեր։

• ՀՀ ՊՆ-ն կեղծ է որակել տեղեկությունները, թե 2025-ին Ադրբեջանի զինված ուժերը Հայաստանի տարածքում նոր դիրքեր են տեղակայել։