Լուրերը մեկ տողով. ՀՀ–ԱՄՆ նոր քայլեր. Իրանն ուժեղացնում է հարվածները. պատմական քայլ նավթի շուկայում

Անցած ժամվա լուրերը՝ հակիրճ և բովանդակային.

• Աշխատանքային այցով Ֆրանսիայում գտնվող վարչապետ Նիկոլ Փաշինյանը հանդիպել է Էմանուել Մակրոնին և Փարիզում մասնակցել Միջուկային էներգիայի գագաթնաժողովին, իսկ այսօր կմեկնի Ստրասբուրգ՝ ելույթ ունենալու Եվրոպական խորհրդարանում։

• Փաշինյանն ու Մակրոնը քննարկել են Հայաստան–Ֆրանսիա երկկողմ հարաբերությունների օրակարգը, ինչպես նաև տարածաշրջանում խաղաղության և կայունության ամրապնդման հարցերը։

• Քննարկվել են նաև Հայաստան–Եվրոպական միություն համագործակցության հետագա զարգացման հեռանկարները։

• ԱԳ նախարար Արարատ Միրզոյանը հանդիպել է ԱՄՆ պետքարտուղարի տեղակալ Թոմաս Դինանոյի հետ՝ քննարկելով ՀՀ–ԱՄՆ ռազմավարական գործընկերության խորացումը և միջուկային էներգիայի խաղաղ օգտագործման համաձայնագիրը։

• Միրզոյանը Ֆրանսիայի ԱԳ նախարարի հետ քննարկել է Հայաստան–Ֆրանսիա ռազմավարական գործընկերության զարգացումը, ինչպես նաև էներգետիկայի և ենթակառուցվածքների ոլորտներում համագործակցությունը։

• ՏԿԵ նախարար Դավիթ Խուդաթյանը Թուրքիայի էներգետիկայի նախարարի հետ քննարկել է Հայաստանի և Թուրքիայի միջև էներգետիկ համագործակցության հնարավորությունները։

• «Քաղաքացիական պայմանագիր» կուսակցության վարչության նիստում քննարկվել են Հայաստանի նոր Սահմանադրության նախագծին առնչվող հարցեր։

• Քաղաքական վերլուծաբան Արմեն Պետրոսյանի խոսքով՝ Իրանի շուրջ պատերազմը կարող է ավարտվել ռազմավարական նպատակների իրագործման կամ կողմերի ռեսուրսների սպառման դեպքում։

• Փորձագետների գնահատմամբ՝ Իրանի շուրջ հակամարտությունը կարող է ավարտվել մինչև մարտի 21–23-ը՝ Նովրուզի նախօրեին։

• Սենատի մեծամասնության առաջնորդ Ջոն Թունի խոսքով՝ ԱՄՆ-ը Իրանի դեմ ռազմական գործողությունների վրա օրական ծախսում է շուրջ 900 միլիոն դոլար։

• Իրանի ԻՀՊԿ-ն հայտարարել է, որ «Ճշմարիտ խոստում 4» գործողության 37-րդ ալիքը եղել է ամենաինտենսիվը՝ թիրախավորելով ամերիկյան և իսրայելական դիրքերը։

• NYT-ի տվյալներով՝ Իրանի նոր առաջնորդ Մոջթաբա Խամենեին պատերազմի սկզբում վիրավորվել է և ստացել ոտքի վնասվածքներ։

• Կատարը հայտարարել է, որ չի պատրաստվում միջնորդ լինել Իրանի համար՝ ընդգծելով, որ երկիրը ենթարկվել է հարձակումների Թեհրանի կողմից։

• Ատոմային էներգիայի միջազգային գործակալության ղեկավար Ռաֆայել Գրոսին հայտնել է, որ Իրանի միջուկային ներուժը հարվածներից հետո նվազել է, սակայն ամբողջությամբ չի վերացվել։

• Միջազգային էներգետիկ գործակալությունը առաջարկել է նավթի պատմության մեջ ամենախոշոր պաշարների դուրսբերումը՝ շուկան կայունացնելու համար։

• ԱՄՆ նախագահի հատուկ բանագնաց Սթիվ Ուիտկոֆը հայտնել է, որ ԱՄՆ–Ռուսաստան–Ուկրաինա եռակողմ հանդիպումը հետաձգվել է մինչև հաջորդ շաբաթ։