Սիրիացիների փոխանցումը պայմանավորված է Թուրքիայի հետ հարաբերությունների գործընթացով. Սրբուհի Գալյան
Թուրքիայի հետ հարաբերությունների բարելավման համատեքստում է ընտրվել սիրիացիներին փոխանցելու տարբերակը։ Այս մասին մամլո ասուլիսի ժամանակ հայտարարել է ՀՀ արդարադատության նախարար Սրբուհի Գալյանը՝ պատասխանելով հարցին, թե ինչ իրավական հիմքով և ինչ պայմանագրերի շրջանակում է իրականացվել փոխանցումը, ինչպես նաև՝ արդյոք եղել են փոխանակում իրականացնելու վերաբերյալ դիմումներ։
Նախարարի խոսքով՝ փոխանցված անձինք փոխանցվել են այն պայմանով, որ պետք է շարունակեն կրել իրենց պատիժը։ Նա նշել է, որ հարցը կարգավորվել է քրեական վարույթներով իրավական օգնության մասին օրենքի շրջանակում, որը թույլ է տալիս գործընթացն իրականացնել փոխադարձության սկզբունքի հիման վրա՝ հաշվի առնելով առկա հնարավորությունները։
Գալյանը հավելել է, որ փոխանցումը կատարվել է նաև Սիրիայի հետ հարաբերությունները բարելավելու նպատակով։ Նրա խոսքով՝ քննարկվել են փոխանցման տարբեր տարբերակներ, սակայն ընտրվել է տվյալ ճանապարհը։
Անդրադառնալով հարցին, թե ինչու է փոխանցումն իրականացվել Թուրքիայի միջոցով, նախարարը նշել է, որ որևէ իրավական արգելք չկա, և հնարավոր է փոխանցումն իրականացնել ցանկացած պետության միջոցով։
