Իրանի ԱԳՆ-ն հայտարարություն ունի

Իրանի Իսլամական Հանրապետության Արտաքին գործերի նախարարության խոսնակ Էսմայիլ Բաղային հայտարարել է, որ Իսլամական հեղափոխության պահապանների կորպուսը (ԻՀՊԿ) կարևոր դեր ունի Պարսից ծոցի և Օրմուզի նեղուցի անվտանգության ու կայունության պահպանման գործում։ Նրա խոսքով՝ տարածաշրջանի բոլոր կողմերը պետք է հաշվի առնեն այս իրողությունը։

Բաղային ընդգծել է, որ Իրանի կողմից իրականացվող ռազմական զորավարժությունները պարբերական բնույթ են կրում և անցկացվում են ամեն տարի՝ հաստատված ժամանակացույցի համաձայն։ Նա նշել է, որ այս տարվա զորավարժությունները ևս կիրականացվեն բարձր մասնագիտական մակարդակով։

ԱԳՆ խոսնակի փոխանցմամբ՝ նման վարժանքների հիմնական նպատակը երկրի պաշտպանական կարողությունների ամրապնդումն է և զինված ուժերի պատրաստվածության բարձրացումը։ Ըստ նրա՝ զորավարժությունները ուղղված չեն որևէ կոնկրետ երկրի դեմ և իրականացվում են ազգային անվտանգության շրջանակում։

Էսմայիլ Բաղային հավելել է, որ Իրանը շարունակելու է իր պաշտպանական քաղաքականությունը՝ պահպանելով տարածաշրջանային անվտանգությունն ու ծովային հաղորդուղիների կայուն գործունեությունը։