ԱՄՆ-ն նոր պատժամիջոցներ է սահմանել Իրանի դեմ
ԱՄՆ ֆինանսների նախարարության հայտարարության համաձայն՝ Միացյալ Նահանգները պատժամիջոցների նոր փաթեթ է սահմանել Իրանի և ահաբեկչության հետ կապված անձանց դեմ։ Պատժամիջոցների տակ են հայտնվել յոթ իրանցի անձինք և առնվազն մեկ կազմակերպություն։
Պատժամիջոցների ցանկում, ի թիվս այլոց, ընդգրկված է Իրանի ներքին գործերի նախարար Էսկանդար Մոմենին, որը վերահսկում է իրավապահ մարմինները։ ԱՄՆ ֆինանսների նախարարությունը հայտարարել է, որ այդ կազմակերպությունները պատասխանատու են հազարավոր խաղաղ ցուցարարների մահվան համար։
Պատժամիջոցների մեջ է նաև իրանցի ներդրող Բաբակ Մորտեզա Զանջանին, որին Վաշինգտոնը մեղադրում է նավթի արտահանումից ստացված միլիարդավոր դոլարների յուրացման և Իսլամական հեղափոխության պահապանների կորպուսի (ԻՀՊԿ) հետ կապված նախագծերի ֆինանսական աջակցության մեջ։
ԱՄՆ ֆինանսների նախարար Սքոթ Բեսենթը հայտարարել է, որ Իրանի կառավարությունը նավթի եկամուտները ծախսում է իր միջուկային ծրագրի, հրթիռների մշակման և «ահաբեկչական միջնորդներին» աջակցելու վրա՝ երկիրը զարգացնելու փոխարեն։ Նա ասել է, որ Թրամփի վարչակազմը կշարունակի պատժամիջոցներ կիրառել իրանական ցանցերի, կոռումպացված էլիտաների և սահմանափակումները շրջանցելու սխեմաների նկատմամբ, ներառյալ թվային ակտիվների օգտագործումը։
