Միայն օրենքով չեն անձինք հրաժարվել ծառայությունից․ փող են տվել «հարց լուծողին»․ Սարգսյան
Միայն 2019-2023թթ. ընթացքում 3,774 քրեական գործ է կարճվել ոչ արդարացնող հիմքով՝ փաստաբաններով, բժիշկներով, այլ միջոցներով: Այս մարդիկ չեն ծառայել ու չեն դատապարտվել: Ինձ ասում էին՝ փող ենք տվել մեկին, մեր հարցը լուծել է: Ես՝ որպես օրենսդիր, տարակուսում եմ, որովհետև իրենք պետք է այդ գումարը՝ 10 մլն դրամը, բերեին տային պետությանը և 1 ամիս ծառայեին, իսկ այս դեպքում տվել են «հարց լուծողին» ու չեն ծառայել: Այս մասին ԱԺ-ում ասել է «Քաղաքացիական պայմանագիր» խմբակցության պատգամավոր Հայկ Սարգսյանը:
«Ես ուզում եմ, որ մենք ուշադրություն դարձնենք, որ միայն օրենքով սահմանված կարգով չեն անձինք հրաժարվել ծառայությունից: 2019 թվականին ես ուսումնասիրում էի ու ելույթներով հանդես էի գալիս, որ նման նախագիծ եմ շրջանառել՝ ծառայել 1 ամիս և վճարել 10 մլն դրամ, ինձ հետ տասնյակ քաղաքացիներ էին կապի դուրս գալիս, ովքեր ցանկություն էին հայտնում օգտվել այդ օրենքից: Սրանով է պայմանավորված, որ գումարը պետք է լինի համաչափ, այնպիսի գումար լինի, որ իրատեսական լինի պետությանը տալը»,- նշել է նա:
«Այժմ ունենք 1200-ից ավելի տղաներ, որոնք չունեն որևէ այլընտրանք, քան ՀՀ վերադառնալու դեպքում դատապարտվելը: Այսօր ներկայացված փոփոխությամբ այս հարցը կլուծվի մեկընդմիշտ:
Բոլորը, ում 27 տարին լրացել է կամ կլրանա, կկարողանան օգտվել իմ առաջարկած 5 տարբերակներից որևէ մեկից և ազատվել քրեական պատասխանատվությունից, քանի որ ծառայության սահմանային տարիքն այլևս 37 տարին է նրանց համար»,- ասել էր Սարգսյանը։
Նշեք, որ նախագծով առաջարկվում է, որ 27-37 տարեկան քաղաքացիները կարող են ազատվել քրեական պատասխանատվությունից՝ կամովին վերադառնալով Հայաստանի Հանրապետություն և ընտրելով նշված հինգ տարբերակներից մեկը.
1. ծառայել 24 ամիս ժամկետով,
2. ծառայել 12 ամիս ժամկետով և պետական բյուջե վճարել 2.5 մլն դրամ,
3. ծառայել 6 ամիս ժամկետով և պետական բյուջե վճարել 5 մլն դրամ,
4. ծառայել 1 ամիս ժամկետով և պետական բյուջե վճարել 10 մլն դրամ,
5. զինվորական ծառայության փոխարեն պետական բյուջե վճարել 15 մլն դրամ:
Նախագիծն ԱԺ հանձնաժողովի նիստի կողմից դրական եզրակացություն է ստացել, առաջարկի վերաբերյալ դրական եզրակացություն է տվել նաև Կառավարությունը:
