Չինաստանը կոչ է արել ԱՄՆ-ին չշահարկել «չինական սպառնալիքը» Գրենլանդիայի հարցում

Չինաստանի արտաքին գործերի նախարարության պաշտոնական ներկայացուցիչ Գո Ցզյակունը հայտարարել է, որ Միացյալ Նահանգները պետք է դադարեցնի այսպես կոչված «չինական սպառնալիքի» օգտագործումը՝ որպես սեփական շահերը առաջ մղելու պատրվակ։ Նա այդ մասին ասել է այսօր կայացած ճեպազրույցի ընթացքում՝ մեկնաբանելով Գրենլանդիայի շուրջ ստեղծված իրավիճակը։

Գո Ցզյակունի հայտարարությունը հաջորդել է ԱՄՆ նախագահ Դոնալդ Թրամփի՝ շաբաթ օրը հնչեցրած հայտարարությանը, ըստ որի ԱՄՆ-ն մաքսատուրքեր է սահմանում Դանիայի, Նորվեգիայի, Շվեդիայի, Ֆրանսիայի, Գերմանիայի, Մեծ Բրիտանիայի, Նիդեռլանդների և Ֆինլանդիայի նկատմամբ՝ Գրենլանդիայի հարցում նրանց դիրքորոշման պատճառով։ Նախատեսվում է, որ մաքսատուրքը ուժի մեջ կմտնի փետրվարի 1-ից և կկազմի 10 տոկոս, իսկ հունիսից կբարձրանա մինչև 25 տոկոս։

ԱՄՆ նախագահի խոսքով՝ սահմանված մաքսատուրքերը կգործեն նշված երկրների բոլոր ապրանքների նկատմամբ մինչև Գրենլանդիան ԱՄՆ-ի կողմից ձեռք բերելու վերաբերյալ գործարքի կնքումը։ Ավելի վաղ Թրամփը նաև հայտարարել էր, որ Դանիան ի վիճակի չէ խոչընդոտել Ռուսաստանին և Չինաստանին, եթե նրանք ցանկանան վերահսկողություն հաստատել Գրենլանդիայի նկատմամբ։

Պեկինը, արձագանքելով այդ հայտարարություններին, ընդգծել է, որ ԱՄՆ-ը պետք է հրաժարվի Չինաստանի անունը օգտագործելուց՝ միջազգային հարցերում սեփական քաղաքական և տնտեսական նպատակները արդարացնելու համար։