Չեխիան ունի դրա կարիքը․ չի վաճառի իր տեղական արտադրության ինքնաթիռները Ուկրաինային

Չեխիան չի վաճառի իր տեղական արտադրության L-159 ինքնաթիռները Ուկրաինային, քանի որ չեխական բանակը դրանց կարիքն ունի, հայտարարել է վարչապետ Անդրեյ Բաբիշը երկուշաբթի օրը մամուլի ասուլիսում։

«Մենք պաշտպանության նախարար Յարոմիր Զունային հրավիրեցինք իշխող կոալիցիայի առաջնորդների հանդիպմանը: Նա մեզ ասաց, որ բանակին այս ինքնաթիռներն անհրաժեշտ են, քանի որ դրանց ծառայության ժամկետը լրանում է 2040 թվականին: Անգարներում անգործության մատնված ինքնաթիռներ չկան. դրանք բոլորը շահագործման մեջ են: Այնպես որ, մեզ դրանք անհրաժեշտ են», - ասել է վարչապետը՝ հավելելով, որ Պաշտպանության նախարարության նախորդ ղեկավարությունը նմանատիպ որոշում էր կայացրել 2023 թվականին։

Կիրակի օրը Չեխիայի նախագահ Պետր Պավելը մամուլի ասուլիսում հայտարարեց, որ անցյալ շաբաթ Կիևում իր բանակցությունների ժամանակ ուկրաինական կողմը L-159 ինքնաթիռները գնահատել է որպես չափազանց հարմար արագընթաց և մեծ անօդաչու թռչող սարքերին հակազդելու համար: Պավելի խոսքով, այս ինքնաթիռները բանակցությունների առարկա են եղել առնվազն վեց ամիս։ Խոսակցություններ կային դրանք Ուկրաինային վարձակալության տալու, ապա նվիրաբերելու մասին: Սակայն մինչ օրս կողմերից ոչ մեկը չի ընդունել այս տարբերակները: Պավելը հայտնել է, որ Վլադիմիր Զելենսկին առաջարկել է Ուկրաինայի համար գնել L-159 ինքնաթիռը: