Գրենլանդիայի նկատմամբ ուժային քայլերը կունենան լուրջ հետևանքներ․ ՆԱՏՕ-ի վերջը կլինի․ սենատոր
ԱՄՆ-ի կողմից Գրենլանդիայի հնարավոր անեքսիան կարող է հանգեցնել ՆԱՏՕ-ի փլուզմանը և սրել հարաբերությունները Եվրոպայի հետ՝ մինչև անգամ ռազմական բախման։ Այս տեսակետը հայտնել է Կոնեկտիկուտ նահանգը ներկայացնող դեմոկրատ սենատոր Քրիս Մերֆին NBC հեռուստաալիքին տված հարցազրույցում։
Նրա խոսքով՝ նման սցենարի դեպքում ՆԱՏՕ-ն պարտավոր կլինի պաշտպանել Գրենլանդիան, ինչն առաջացնում է հարց՝ արդյոք Միացյալ Նահանգները կարող է հայտնվել պատերազմի մեջ եվրոպական գործընկերների, այդ թվում՝ Մեծ Բրիտանիայի և Ֆրանսիայի հետ։ Մերֆին ընդգծել է, որ Գրենլանդիայի նկատմամբ ուժային քայլերը կունենան լուրջ աշխարհաքաղաքական հետևանքներ։
Հիշեցնենք՝ ԱՄՆ կոնգրեսական Ռենդի Ֆայնը ներկայացրել էր օրինագիծ, որը նախատեսում է Գրենլանդիայի անեքսիա և դրա համար ԱՄՆ նահանգի կարգավիճակի տրամադրում։ Նախաձեռնությունն արդեն իսկ առաջացրել է քննարկումներ ամերիկյան քաղաքական շրջանակներում։
Մերֆին նաև քննադատել է ԱՄՆ նախագահ Դոնալդ Թրամփին՝ նշելով, որ վերջինս, իր կարծիքով, կենտրոնացած է այնպիսի հարցերի վրա, որոնք անմիջական նշանակություն չունեն ԱՄՆ քաղաքացիների համար։
