Հայ ժողովուրդը ամիսներ անց պատմական հնարավորություն է ունենալու փոխելու իր իսկ կողմից ձևավորված իշխանությունը. Էդմոն Մարուքյան

Նկատում եմ, որ վերջին շրջանում շատ քաղաքական գործիչներ և փորձագետներ հայտարարում են, թե իշխանափոխությունը հնարավոր է, բայց ոչ ընտրություններով, այլ՝ ինչ-որ այլ գործընթացների միջոցով։ Այս մասին իր տելեգրամյան ալիքում գրել է «Լուսավոր Հայաստան» կուսակցության առաջնորդ Էդմոն Մարուքյանը։

«Ուզում եմ հասկանալ՝ նմանատիպ մտքեր արտահայտող մարդիկ ու՞մ ջրաղացին են ջուր լցնում։ Արդյո՞ք հենց գործող իշխանությունների շահերից չի բխում, որ ժողովուրդը հույս չկապի ընտրությունների հետ և չմասնակցի դրանց։

Եթե չեք հավատում, որ ընտրություններով հնարավոր է հասնել իշխանափոխության, մինչև ընտրությունները փոխեք իշխանությունը, ինչու՞մ է խնդիրը…

Ես պնդում եմ, որ Հայաստանի Հանրապետությունում իշխանությունը պատկանում է ժողովրդին, և ժողովուրդն իր իշխանությունն իրականացնում է ընտրությունների և հանրաքվեների միջոցով։ Հայ ժողովուրդը ամիսներ անց պատմական հնարավորություն է ունենալու փոխելու իր իսկ կողմից ձևավորված իշխանությունը։

Մարդկանց պետք է մոտիվացնել, որպեսզի նրանք ճիշտ օգտագործեն այդ հնարավորությունը, այլ ոչ թե հուսալքել, ետ պահել ընտրություններից՝ դրա փոխարեն ոչ մի իրական լուծում չառաջարկելով»,– գրել է նա։