Թուրքիայի վերադարձը F-35 ծրագրին անհրաժեշտ է ՆԱՏՕ-ի անվտանգությանը. Էրդողան

«Bloomberg»-ի հետ զրույցում Թուրքիայի նախագահ Ռեջեփ Թայիփ Էրդողանը կոչ է արել F-35 կործանիչների ծրագրում ընդգրկել Թուրքիային՝ նշելով, որ այդ քայլը կնպաստի թուրք-ամերիկյան հարաբերությունների, ինչպես նաև ՆԱՏՕ-ի անվտանգության ամրապնդմանը, գրում է ermenihaber-ը։

«Թուրքիայի կողմից արդեն վճարված F-35 ինքնաթիռների ստացումն ու ծրագրին կրկին ներգրավվելը կարևոր և անհրաժեշտ է»։

Էրդողանը նաև նշել է, որ Ռուսաստանի կողմից ռազմական տեխնիկա ձեռք բերելու պատճառով Թուրքիային F-35 ծրագրից դուրս թողնելու որոշումը եղել է «անարդար»։ Նրա խոսքով՝ Դոնալդ Թրամփի վերընտրվելը ԱՄՆ նախագահի պաշտոնում նոր հնարավորություն է ստեղծել, որպեսզի Թուրքիայի և ԱՄՆ-ի հարաբերությունները զարգանան ավելի ողջամիտ և կառուցողական հիմքերի վրա։

«F-16 Block» ռազմական ինքնաթիռների հնարավոր ձեռքբերման վերաբերյալ Թուրքիայի նախագահը հայտարարել է, որ Անկարան ակնկալում է, որպեսզի պայմանները համապատասխանեն ՆԱՏՕ-ի դաշինքի ոգուն՝ որպես օրինակ մատնանշելով «Eurofighter Typhoon» ինքնաթիռների գնման գործընթացը։