Պետրոսյանը՝ Վարդաշեն ենթակայանի և Ամանորին տեղի ունեցած հոսանքազրկումների մասին

Անցյալ տարի Ամանորի կեսգիշերին մեր հանրապետությունում հոսանքազրկված է եղել շուրջ 32,000 բաժանորդ, իսկ այս տարի՝ 9,200, գրեթե 4 անգամ ավելի պակաս: Պարզապես քանի-որ ՀԷՑ-ի շուրջ մեր լրատվականների և քաղաքական որոշ շրջանակների ուշադրությունն ավելի սևեռված էր, այդ իրավիճակը ավելի ֆետիշացվեց: Այս մասին լրագրողների հետ զրույցում նշել է ՀԷՑ-ի ժամանակավոր կառավարիչ Ռոմանոս Պետրոսյանը:

«Բնականաբար ես մեր քաղաքացիների ու բաժանորդների ներողամտությունն եմ հայցում ու ՀԷՑ-ի կողմից ներողություն եմ խնդրում պատճառված անհարմարությունների համար: Բայց և բոլորդ գիտակցում եք, թե ինչ վատթար, մաշված ու ոչ բարեկարգ վիճակում է գտնվում Հայաստանի էլեկտրական ցանցերի ենթակառուցվածքները: Այդ իրավիճակով պայմանավորված, ինչպես նաև վերջին շրջանում էլէկտրաէներգիայի սպառման շեշտակի աճի պարագայում որոշ ենթակայաններում ունեցել ենք վթարային վիճակներ»,- ասել է Պետրոսյանը:

Խոսելով Վարդաշեն ենթակայանի մասին՝ Ռոմանոս Պետրոսյանը նշել է, որ սպառման ծավալը բարձրացած է եղել, հոսանքազրկումը դրանով է պայմավորված եղել. «48-52 ժամ անդադար՝ ահռելի ծավալի աշխատանքներ են տարվել վթարները վերականգնելու համար»:

Անդրադառնալով ՀԷՑ-ի զանգերին չպատասխանելու մասին՝ Ռոմանոս Պետրոսյանը ասել է, որ պետք չէ թիրախավորել ՀԷՑ-ի աշխատակիցներին, քանի-որ աշխատակիցները չեն կարող միաժամանակ մի քանի հազար զանգ սպասարկել: