Թուրքիան հավանություն չի տալիս ԱՄՆ-ի գործողություններին. Էրդողան
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան հավանություն չի տալիս միջազգային իրավունքին հակասող գործողություններին։
Թուրքիայի նախագահը հայտնել է, որ ԱՄՆ նախագահ Դոնալդ Թրամփի հետ ունեցած հեռախոսազրույցի ընթացքում նրան ներկայացրել է Վենեսուելայում տեղի ունեցող իրադարձությունների վերաբերյալ Անկարայի դիրքորոշումը։
Էրդողանի խոսքով՝ «Թուրքիան և նրա ժողովուրդը կշարունակեն գտնվել բարեկամ Վենեսուելայի բնակիչների կողքին՝ աջակցելով այդ երկրի բնակիչների բարեկեցության զարգացմանն ու աճին ուղղված ջանքերին։ Մադուրոն և ընդհանրապես վենեսուելացի ժողովուրդը բազմիցս հաստատել են, որ Թուրքիայի բարեկամներն են»։
Նա նշել է, որ «Թուրքիան և Վենեսուելան, որպես երկու բարեկամ պետություններ, առաջնահերթություն են տվել համերաշխությանը, այդ թվում՝ մեր երկրների համար բարդ ժամանակահատվածներում»։
«Պետությունների ինքնիշխան իրավունքների և, ընդհանուր առմամբ, միջազգային իրավունքի նորմերի խախտումը ռիսկային քայլ է, որը կարող է հանգեցնել լուրջ բարդությունների գլոբալ մակարդակում։ Մի աշխարհում, որտեղ ուժեղի իրավունքը գերակշռում է օրինականությանը, անկայունությունը, ճգնաժամերն ու հակամարտությունները անխուսափելի են։ Թուրքիան հավանություն չի տալիս միջազգային իրավունքին հակասող որևէ գործողության»,- ընդգծել է Թուրքիայի նախագահը:
