Ես ուզում եմ շարունակել տիտղոսներ նվաճել․ Ռոնալդու

«Ալ-Նասրի» և Պորտուգալիայի հավաքականի հարձակվող Կրիշտիանու Ռոնալդուն խոսել է կարիերայի հետագա ծրագրերի մասին Դուբայում կայացած Globe Soccer Awards մրցանակաբաշխության ժամանակ, որտեղ դեկտեմբերի 28-ին արժանացել է «Տարվա մարզիկ» կոչմանը։

«Ինձ համար մեծ հաճույք է գտնվել այս գալա-երեկոյին՝ այսքան շատ մարզական դեմքերի շրջապատում։ Սա իմ սիրելի միջոցառումներից է, քանի որ այստեղ հանդիպում եմ անհավանական մարդկանց, այդ թվում՝ կնոջս։

Շարունակել ելույթները բարդ է, բայց ես դեռ կիրք ունեմ և մոտիվացված եմ շարունակելու։ Կապ չունի՝ Մերձավոր Արևելքում եմ խաղում, թե Եվրոպայում, ես ուզում եմ շարունակել տիտղոսներ նվաճել և հասնել այն սահմանագծին, որի մասին բոլորը գիտեն։ Վստահ եմ՝ կհասնեմ դրան, եթե վնասվածքներ չլինեն։ Վայելեք երեկոն և շնորհավոր Ամանոր»,- Ռոնալդուի խոսքերն է մեջբերում Goal-ը։

Հիշեցնենք, որ ավելի վաղ հաղորդվում էր պորտուգալացու՝ կարիերայի ընթացքում 1000 գոլի շեմին հասնելու ցանկության մասին։ Այս պահին նրա ակտիվում կա 956 գոլ։