Նա այն մարդն է, որը «գահընկեց» կանի Թոփուրիային․ UFC-ի նախկին չեմպիոնը` Ծառուկյանի մասին
UFC-ի նախկին չեմպիոն, ամերիկացի մարտիկ Հենրի Սեխուդոն արձագանքել է Դոհայում անցկացված մրցաշարի ընթացքում Արման Ծառուկյանի տպավորիչ հաղթանակին։ Սեխուդոն վստահեցրել է, որ հենց Ծառուկյանն է այն մարզիկը, ով կարող է հաղթել Իլիա Թոփուրիային։
«Արման Ծառուկյանն ընդդեմ Իլիա Թոփուրիայի․ սա միակ մենամարտն է, որն իմաստ ունի թեթև քաշային կարգի տիտղոսային մրցավազքում։ Նշանակե՛ք այդ մարտը։ Ծառուկյանի կողմից սա անթերի ելույթ էր։ Նա այն տղամարդն է, որը գահընկեց կանի Թոփուրիային»,– գրել է Սեխուդոն սոցիալական ցանցերում։
Հիշեցնենք՝ նոյեմբերի 22-ին Արման Ծառուկյանը երկրորդ ռաունդում խեղդող հնարքով պարտության է մատնել նորզելանդացի Դեն Հուքերին։ Սա նրա 23-րդ հաղթանակն է խառը մենամարտերում անցկացրած 26 մենամարտերից։
