Թրամփի ուղին ընդգծում է նրա անձնական շահագրգռվածությունը տարածաշրջանի խաղաղության գործընթացում
Միացյալ Նահանգները մեծացնում է հետաքրքրությունը Հարավային Կովկասի և Կենտրոնական Ասիայի նկատմամբ, ինչի կարևոր ցուցանիշ է տարածաշրջանային համագործակցության C5+1 ձևաչափի ընդլայնումը C6+1 ձևաչափով՝ Ադրբեջանի ներգրավմամբ։ Այս մասին հայտարարել է Ատլանտյան խորհրդի Եվրասիայի կենտրոնի ավագ տնօրեն Ջոն Է. Հերբստը Ադրբեջան–ԱՄՆ առաջին վերլուծական կենտրոնների ֆորումի ընթացքում:
Հերբստի խոսքով՝ նախագահ Դոնալդ Թրամփի վարչակազմը փորձում է ավելի ակտիվ դեր ունենալ համաշխարհային թեժ գոտիներում, մասնավորապես՝ Հարավային Կովկասում խաղաղության ամրապնդման գործում։ Նա հիշեցրել է օգոստոսի 8-ին Օվալաձև աշխատասենյակում կայացած հանդիպումը, որի արդյունքում ԱՄՆ, Ադրբեջանի և Հայաստանի ղեկավարները ստորագրել են Բաքու–Երևան խաղաղ գործընթացը խթանող փաստաթուղթ։
«Թրամփի ուղին ընդգծում է նրա անձնական նվիրվածությունը տարածաշրջանում խաղաղության գործընթացի առաջխաղացմանը։ Վաշինգտոնը ներկայումս խորացնում է հարաբերությունները ինչպես Ադրբեջանի, այնպես էլ Հայաստանի հետ, ինչը նպաստում է տարածաշրջանային կայունությանն ու տնտեսական համագործակցության զարգացմանը»,- նշել է Հերբստը։
Նրա խոսքով՝ Թուրքիայի և Հայաստանի միջև հարաբերությունների կարգավորումը նույնպես կարևոր նշանակություն ունի տարածաշրջանային ընդհանուր կայունության համար։
Հերբստը հավելել է, որ ԱՄՆ-Ադրբեջան առաջին վերլուծական կենտրոնների ֆորումի մեկնարկը, ինչպես նաև C6+1 կառուցվածքի ձևավորումը նոր էջ են բացում Վաշինգտոնի, Բաքվի և Կենտրոնական Ասիայի երկրների փորձագիտական համայնքների համագործակցության համար։
