18:00 Լուրերը մեկ տողով. ՍԴ-ի վերջնական որոշում, Իրանի զգուշացում և Ուկրաինայի ռազմաճակատի վերջին զարգացումները

Անցած ժամվա լուրերը՝ հակիրճ և բովանդակային.

· Սահմանադրական դատարանը մերժեց ընդդիմության դիմումները և ուժի մեջ թողեց ԿԸՀ-ի՝ 2026 թվականի ԱԺ ընտրությունների արդյունքներն ամփոփող որոշումը։ 

·  Ռուս փորձագետ Վլադիմիր Ավատկովը հայտարարեց, որ դեպի ԵՄ շարժումը Հայաստանի համար հանգեցնում է Ռուսաստանի կողմից տնտեսական սահմանափակումների, այդ թվում՝ գյուղմթերքի արտահանման ոլորտում։ 

·  Ֆրանսիայում ավելի քան 100 հազար մարդ պահանջում է մերժել ոստիկանների կողմից հրազենի կիրառման օրինականության կանխավարկած սահմանող օրինագիծը։ 

·  Իրանի ԻՀՊԿ ռազմածովային ուժերի նոր հրամանատար Ալի Օզմային ԱՄՆ-ին և Իսրայելին նախազգուշացրեց մոտալուտ պատասխան գործողությունների մասին։ 

·  «Բլումբերգ»-ի տվյալներով՝ Պարսից ծոցում առնվազն ութ նավ փոխել է երթուղին՝ տարածաշրջանային լարվածության ֆոնին։ 

·  Վոլոդիմիր Զելենսկին և Գերմանիայի կանցլեր Ֆրիդրիխ Մերցը քննարկել են Ուկրաինային Patriot համակարգերի մատակարարումը և ռազմաճակատում ստեղծված իրավիճակը։ 

·  Ուկրաինայի ԶՈւ գլխավոր հրամանատար Ալեքսանդր Սիրսկին հայտարարել է, որ Ռուսաստանը նոր լայնածավալ հարվածների նախապատրաստության շրջանակում մեծացնում է դրոնների և ուժերի կուտակումը։ 

·  Իսրայելի ազգային անվտանգության նախարար Իտամար Բեն-Գվիրը չեղարկել է Նյու Յորք այցը՝ բողոքի ակցիաների և իրեն ձերբակալելու կոչերի պատճառով։