Երևանում քանդվելու է Հովհաննես Թումանյանի տուն-թանգարանի երկրորդ մասնաշենքը․ մանրամասներ

Հովհաննես Թումանյանի տուն-թանգարանի երկրորդ մասնաշենքը կքանդվի։ Համապատասխան որոշումը ընդունվել է Երևանի ավագանու նոյեմբերի 18-ի նիստում։

Նշվում է, որ դրա տեղում նախատեսվում է նոր շենքի կառուցում: Որոշման նախագիծը ներկայացրել է Հայաստանի կրթության, գիտության, մշակույթի և սպորտի նախարարությունը:

Նշենք, որ նախկինում ՀՀ կառավարությունը 750 միլիոն դրամ էր հատկացրել թանգարանի երկրորդ մասնաշենքի վերակառուցման և առաջին մասնաշենքի վերանորոգման համար, որը փակ է 2023 թվականի սեպտեմբերից։

2025 թվականի սեպտեմբերին թանգարանի տնօրեն Լուսինե Կարախանյանը լրատվամիջոցներին հայտնել է, որ նախկինում հաստատված նախագծի համաձայն՝ երկրորդ շենքի պատերից մեկը պետք է ամրացվեր, սակայն ապամոնտաժման ժամանակ պարզվել է, որ պատը ենթակա է քանդման՝ սեյսմիկ կայունության վերաբերյալ սխալի պատճառով։