Չինաստանը խիստ բողոք է հայտնել Ճապոնիային Թայվանի հարցում

Չինաստանի փոխարտգործնախարար Սուն Վեյդոնգը խիստ բողոք է հայտնել Տոկիոյին՝ Ճապոնիայի վարչապետ Սանաե Տակաիչիի Թայվանի վերաբերյալ վերջին հայտարարությունների կապակցությամբ։ Այս մասին հայտնել է ԱԳՆ խոսնակ Լին Ցզյանը մամուլի ասուլիսի ժամանակ։

Ցզյանի խոսքով՝ Պեկինը պահանջում է, որ Ճապոնիան «խորապես մտորի իր պատմական հանցագործությունների շուրջ», դադարեցնի միջամտությունը Չինաստանի ներքին գործերին և հրաժարվի սադրիչ քայլերից։ «Թայվանի հարցում կրակի հետ խաղացողները կկործանվեն դրա մեջ», — ընդգծել է նա։

Չինաստանի ԱԳՆ-ն հայտարարում է, որ Տակաիչիի հայտարարությունները լրջորեն խախտում են «մեկ Չինաստան» սկզբունքը, հակասում են Չինաստանի և Ճապոնիայի միջև կնքված չորս քաղաքական փաստաթղթերի ոգուն, ինչպես նաև միջազգային հարաբերությունների հիմնական նորմերին։ Պեկինը դրանք համարում է Չինաստանի ինքնիշխանությանը ուղղված մարտահրավեր և ներքին գործերին կոպիտ միջամտություն։

«Եթե Ճապոնիան համարձակվի ռազմական միջամտություն կատարել Թայվանի նեղուցում, դա կլինի ագրեսիա, և Չինաստանը կարձագանքի վճռական ուժով», — հավելել է Լին Ցզյանը։

Վերջին զարգացումները հետևում են Տակաիչիի հայտարարությանը, ըստ որի՝ հնարավոր չինական հարձակումն ընդդեմ Թայվանի կարող է ստեղծել իրավիճակ, որը կսպառնա Ճապոնիայի գոյատևմանը՝ հիմք տալով կիրառել կոլեկտիվ ինքնապաշտպանության իրավունք։ Պեկինը այս դիրքորոշումը որակել է որպես «չափազանց վտանգավոր» և «անթույլատրելի» միջամտություն։