2026-ից աշխատանքային պայմանագրերը կդառնան ամբողջությամբ էլեկտրոնային․ ՊԵԿ

2025 թվականի ընթացքում էլեկտրոնային աշխատանքային պայմանագրերը կգործեն կամավորության սկզբունքով, իսկ 2026 թվականի հունվարից դրանք պարտադիր կկիրառվեն բոլոր գործատուների և աշխատողների համար։ Այս մասին հայտնում է Պետական եկամուտների կոմիտեն։

Նոր համակարգով աշխատանքային պայմանագրերի կնքումը, դադարեցումը և փոփոխումը կկատարվի բացառապես թվային հարթակի միջոցով։ Գործատուները բոլոր գործողությունները կիրականացնեն «Հաշվետվությունների ներկայացման էլեկտրոնային համակարգ»-ի միջոցով, որտեղ հնարավոր կլինի ստեղծել, ստորագրել և փոփոխել աշխատանքային պայմանագրերը, հրամանները և հավելումները։

Համակարգը ներառում է պարտադիր լրացման դաշտեր, հուշումներ սխալների դեպքում, ինչպես նաև հնարավորություն՝ փաստաթղթերը խմբագրելու, չեղարկելու և որոնելու համար։

Աշխատողները կարող են մուտք գործել «Ֆիզիկական անձանց էլեկտրոնային ծառայությունների միասնական համակարգ»՝ «Աշխատանքային պայմանագրեր» բաժնի միջոցով։ Էլեկտրոնային ստորագրությամբ հնարավոր կլինի դիտել, ստորագրել և հաստատել բոլոր աշխատանքային փաստաթղթերը։

Թվային համակարգը հասանելի կլինի հայերեն, ռուսերեն և անգլերեն լեզուներով։ Նշվում է, որ գործող պայմանագրերը գործատուները պարտավոր կլինեն մինչև 2027 թվականի հունվարը մուտքագրել համակարգ՝ աշխատողների էլեկտրոնային ստորագրությամբ հաստատմամբ։