Չեմ մեկնաբանում ուժայինների գործողությունները. Խուդաթյանը՝ Հովհաննավանքի միջադեպի մասին
Պահպանություն իրականացնող ուժային կառույցների գործողությունները չեմ մեկնաբանում։ Այս մասին այսօր Ազգային ժողովում լրագրողների հետ զրույցում նշել է տարածքային կառավարման և ենթակառուցվածքների նախարար Դավիթ Խուդաթյանը՝ անդրադառնալով կիրակի Հովհաննավանքից քաղաքացուն բերանը փակած դուրս բերելու միջադեպին։
Նախարարը, ի տարբերություն իր որոշ գործընկերների, նշել է, որ տեսել է հրապարակված կադրերը։
«Այդ օրը Հովհաննավանքում չեմ եղել, Վաղարշապատում մասնակցում էի Արգիշտի Մեխակյանի քարոզարշավին»,– հավելել է Խուդաթյանը։
Հիշեցնենք, որ Քաղաքացիական պայմանագիր կուսակցության մի շարք պաշտոնյաներ ավելի վաղ հայտնել էին, որ չեն տեսել միջադեպի տեսանյութը, որտեղ քաղաքացու բերանը փակում են, երբ նա հայտարարում է, թե Ստեփան Ասատրյանը կարգալույծ է հռչակված և իրավունք չունի պատարագ մատուցել։ Նման հայտարարություններ են արել արդարադատության նախարար Սրբուհի Գալյանը, ԱԺ ՔՊ-ական պատգամավոր Վլադիմիր Վարդանյանը և Կադաստրի կոմիտեի ղեկավար Սուրեն Թովմասյանը։
